ബ്യൂണസ് അയേഴ്‌സ്: ഖത്തര്‍ 2022 ലോകകപ്പിനായുള്ള തെക്കേ അമേരിക്കന്‍ രാജ്യങ്ങളുടെ യോഗ്യതാ മത്സരത്തില്‍ സമനില വഴങ്ങി അര്‍ജ്ജന്റീന. രണ്ടാം മത്സരത്തില്‍ ഇക്വഡോറും യോഗ്യതാ മത്സരത്തില്‍ മുന്നേറി. പ്രാഥമിക മത്സരങ്ങളിലെല്ലാം ജയിക്കാറുള്ള അര്‍ജ്ജന്റീനയുടെ ഇതുവരെയുള്ള കുതിപ്പിന് തടയിട്ടാണ് പരാഗ്വേ വിജയസമാനമായ സമനില മുന്‍ലോകചാമ്പ്യന്മാര്‍ക്കെതിരെ നേടിയത്.
കളിയുടെ 21-ാം മിനിറ്റിലെ പെനാല്‍റ്റി മുതലാക്കിയാണ് പരാഗ്വേ മുന്നിലെത്തിയത്. ആഞ്ചെല്‍ റൊമേരോയാണ് പെനാല്‍റ്റി ഗോളാക്കിയത്. എന്നാല്‍ ആദ്യപകുതിയില്‍ത്തന്നെ സമനില പടിച്ചെങ്കിലും വിജയ ഗോള്‍ നേടാന്‍ പരാഗ്വേ അര്‍ജ്ജന്റീനയെ അനുവദിച്ചില്ല.
കളിയുടെ 41-ാം മിനിറ്റില്‍ നിക്കോളാസ് ഗോള്‍സാലസാണ് അര്‍ജ്ജന്റീനയ്‌ക്കായി നിര്‍ണ്ണായക സമനില നേടിക്കൊടുത്തത്. മൂന്നാം യോഗ്യതാ മത്സരത്തിലാണ് അര്‍ജ്ജന്റീന പരാഗ്വയേ നേരിട്ടത്. ആദ്യ മത്സരത്തില്‍ ഇക്വഡോറിനെ 1-0നും രണ്ടാം മത്സരത്തില്‍ 2-1ന് ബൊളീവിയയേയും അര്‍ജ്ജന്റീന തോല്‍പ്പിച്ചിരുന്നു.
രണ്ടാം യോഗ്യതാ മത്സരത്തില്‍ ഇക്വഡോര്‍ ബൊളീവിയയെ 3-2ന് തോല്‍പ്പിച്ചു. കളിയുടെ 37-ാം മിനിറ്റില്‍ ബൊളീവിയയാണ് ആദ്യം മുന്നിലെത്തിയത്. ജൂവാന്‍ കാര്‍ലോസ് ആര്‍സെയാണ് ഗോളടിച്ചത്. എന്നാല്‍ രണ്ടാം പകുതിയിയിടെ 46, 55 മിനിറ്റുകളിലെ മറുഗോളുകളിലൂടെ ഇക്വഡോര്‍ 2-1ന് മുന്നിലെത്തി. 60-ാം മിനിറ്റില്‍ മാര്‍സെലോ മൊറേനോ ബൊളീവിയയ്‌ക്ക് സമനില നല്‍കിയെങ്കിലും 88-ാം മിനിറ്റിലെ പെനാല്‍റ്റി മുതലാക്കി ഇക്വഡോര്‍ ആവേശ ജയം പിടിച്ചെടുത്തു. കരുത്തരായ ഉറുഗ്വയെ രണ്ടാം മത്സരത്തില്‍ തോല്‍പ്പിച്ച ഇക്വഡോര്‍ ശക്തമായ മുന്നേറ്റമാണ് നടത്തുന്നത്.
