ശ്രീനഗര്: ജമ്മു കശ്മീര് പോലീസ് സേനയെ കെട്ടിലും മട്ടിലും ആധുനികവല്ക്കരിക്കാ നൊരുങ്ങി പോലീസ് മേധാവി. അതിര്ത്തിയിലെ സുരക്ഷാ പ്രശ്നങ്ങളും കൊടുംഭീകരരുടെ അപ്രതീക്ഷിത ആക്രമണങ്ങളും ഒരേസമയം കൈകാര്യം ചെയ്യുന്ന കശ്മീര് പോലീസ് ഏറ്റവും ആധുനികരീതിയില് തയ്യാറാകണമെന്ന് ജമ്മു കശ്മീര് ഡി.ജി.പി. ദില്ബാഗ് സിംഗ് പറഞ്ഞു.
ജമ്മുകശ്മീര് പോലീസിന്റെ എല്ലാ കേന്ദ്രങ്ങളും ആധുനിക വല്ക്കരിക്കാനുള്ള പദ്ധതികള് എഞ്ചിനീയറിംഗ് വിഭാഗവുമായി സംസാരിക്കവേയാണ് ഡി.ജി.പി നിര്ദ്ദേശം നല്കിയത്. നിലവില് നടന്നുകൊണ്ടിരിക്കുന്ന നിര്മ്മാണ പ്രവര്ത്തനത്തിന്റെ പുരോഗതിയും അദ്ധേഹം വിലയിരുത്തി. നിരവധി വിദൂര പ്രദേശങ്ങളും താഴ്വരകളും മഞ്ഞുമലകളും അടങ്ങുന്ന രാജ്യത്തെ ഏറ്റവും വിപുലവും ദുര്ഘടവുമായ കേന്ദ്രഭരണ പ്രദേശത്തെ പോലീസാണ് ജമ്മുകശ്മീരിലുള്ളത്.
പോലീസിന്റെ വാര്ത്താവിനിമയ സംവിധാനങ്ങള്, കെട്ടിടങ്ങള്, ക്വാര്ട്ടേഴ്സുകള്, വാഹനങ്ങള്, ആയുധങ്ങള്, യൂണിഫോമുകള് എന്നിവയെല്ലാം കാലാനുസൃതമായി പരിഷ്ക്കരിക്കുമെന്നും ദില്ബാഗ് സിംഗ് ഉറപ്പുനല്കി. ഉന്നത തല യോഗത്തില് എഡിജിപി ഗരീബ് ദാസ്, എ.ഐ.ജി. ജാവേദ് ഇഖ്ബാല് മാട്ടൂ, എക്സിക്യൂട്ടീവ് എഞ്ചിനീയര് സജാദ് നാഖ്വിബ് എന്നിവരടക്കം ഇരുപതോളം മുതിര്ന്ന ഉദ്യോഗസ്ഥര് പങ്കെടുത്തു.
Comments