ലണ്ടന്‍:പ്രീമിയര്‍ ലീഗില്‍ ഇത്തവണ കിരീടം ലക്ഷ്യമിടുന്ന ചെല്‍സിക്കും പരാജയം പല തവണ ഏറ്റുവാങ്ങിയ ആഴ്‌സണലിനും ഞെട്ടിക്കുന്ന തോല്‍വി. ചെല്‍സിയെ എവര്‍ട്ടണും ആഴ്‌സണലിനെ ബേണ്‍ലെയും ഏക ഗോളിന് തോല്‍പ്പിച്ചു.
കളിയുടെ ആദ്യപകുതിയില്‍ എവര്‍ട്ടണ്‍ നേടിയ ലീഡ് മറികടക്കാന്‍ ചെല്‍സിക്കായില്ല. 22-ാം മിനിറ്റിലെ പെനാല്‍റ്റിയാണ് എവര്‍ട്ടണ്‍ അവസരമാക്കിയത്. ഗില്‍ഫി സിഗുര്‍സണാണ് പെനാല്‍റ്റി വലയിലെത്തിച്ച് നീലപ്പടയെ ഞെട്ടിച്ചത്. പട്ടികയില്‍ ചെല്‍സി അഞ്ചാം സ്ഥാനത്താണുള്ളത്. എവര്‍ട്ടണ്‍ ഏഴാം സ്ഥാനത്തുമാണ്.
രണ്ടാം മത്സരത്തില്‍ ആഴ്‌സണലിനെ തോല്‍പ്പിച്ച് ബേണ്‍ലി വിലപ്പെട്ട മൂന്നു പോയിന്റുകള്‍ സ്വന്തമാക്കി. ആഴ്‌സണലിന്റെ പിഴവാണ് ബേണ്‍ലേയ്‌ക്ക് ജയം സമ്മാനിച്ചത്. 56-ാം മിനിറ്റില്‍ ഗ്രാനിറ്റ് സാക്ക ചുവപ്പുകാര്‍ഡ് കണ്ടതിനെതുടര്‍ന്ന പത്തുപേരുമായി കളിക്കേണ്ട വന്ന ആഴ്‌സണലിന് സെല്‍ഫ് ഗോള്‍ ഇരട്ട ആഘാതമായി. 73-ാം മിനിറ്റില്‍ പിയറി എംറിക് ഔബാമായംങ്കിന്റെ സെല്‍ഫ് ഗോളാണ് ആഴ്‌സണലിന്റെ വിധിയെഴുതിയത്. ലീഗില്‍ ടോട്ടനത്തോട് 2-0ന് തോറ്റ ശേഷം ബേണ്‍ലെയോട് തോറ്റത് വലിയ ക്ഷീണമായി. പോയിന്റ് പട്ടികയില്‍ ആഴ്‌സണല്‍ 15-ാം സ്ഥാനത്തും ബേണ്‍ലെ 17-ാം സ്ഥാനത്താണ്.
