മിലാൻ: ഇറ്റാലിയൻ ലീഗിലെ മിലാൻ ക്ലബ്ബുകൾക്ക് 2020 അവസാനിക്കുന്നത് മികച്ച നേട്ടം സമ്മാനിച്ചുകൊണ്ട്. എ.സി.മിലാനും ഇന്റർ മിലാനും 2020 അവസാനിക്കുമ്പോൾ ലീഗ് പട്ടികയിൽ ഒന്നും രണ്ടും സ്ഥാനങ്ങളിലെത്തിക്കൊണ്ടാണ്. 2009ന് ശേഷം ഇതാദ്യമായാണ് മിലാൻ ക്ലബ്ബുകൾ ഒരുമിച്ച് ലീഗിലെ ആദ്യ സ്ഥാനങ്ങൾ കയ്യടക്കുന്നത്. നിലവിലെ ലീഗ് ചാമ്പ്യന്മാരായ യുവന്റസിന്റെ സ്ഥാനം ആറാമതാണ്.
ലീഗിൽ 14 മത്സരങ്ങളാണ് മിലാൻ ക്ലബ്ബുകൾ പൂർത്തിയാക്കിയത്. 10 ജയങ്ങളും നാല് സമനിലയുമായി തോൽവിയറിയാതെ 34 പോയിന്റുമായിട്ടാണ് എ.സി.മിലാൻ ഒന്നാം സ്ഥാനത്തുള്ളത്. അത്രയും മത്സരങ്ങളിൽ 10 ജയങ്ങളും മൂന്ന് സമനിലകളും ഒരു തോൽവി യുമടക്കം 33 പോയിന്റാണ് ഇന്റർ മിലാനുള്ളത്. 27 പോയിന്റുള്ള എ.സി.റോമ മൂന്നാം സ്ഥാനത്തും 26 പോയിന്റോടെ സാസുവോളോ നാലാം സ്ഥാനത്തുമാണ്. നാപ്പോളി 25 പോയിന്റോടെ അഞ്ചാം സ്ഥാനത്താണ്. ഇവർക്കും പിന്നിലാണ് ക്രിസ്റ്റ്യാനോയുടെ യുവന്റസ്.
