ന്യൂഡൽഹി: റിപ്പബ്ലിക് ദിനത്തിലെ അക്രമ സംഭവങ്ങളെ അപലപിച്ച് പ്രധാനമന്ത്രി നരേന്ദ്ര മോദി. ചെങ്കോട്ടയിൽ ത്രിവർണ്ണ പതാകയെ അവഹേളിച്ചത് ഏറെ വേദനിപ്പിച്ചുവെന്ന് അദ്ദേഹം പറഞ്ഞു. 73 -ാമത് മൻ കീ ബാത്ത് അഭിസംബോധന ചെയ്യുകയായിരുന്നു അദ്ദേഹം. ചെങ്കോട്ടയിൽ നടക്കാൻ പാടില്ലാത്ത സംഭവങ്ങളാണ് നടന്നത്. അക്രമം ഒന്നിനും പരിഹാരമല്ല. ദേശീയ പതാകയെ അപമാനിച്ചത് രാജ്യത്തെ ഞെട്ടിച്ച സംഭവമാണെന്നും അദ്ദേഹം പറഞ്ഞു.
കൊറോണക്കെതിരായ പോരാട്ടത്തിൽ ഇന്ത്യ വിജയം നേടി. വാക്സിന്റെ കാര്യത്തിൽ ഇന്ത്യ സ്വയം പര്യാപ്തത കൈവരിച്ചു. 15 ദിവസത്തിനകം 30 ലക്ഷം ആരോഗ്യ പ്രവർത്തകർ രാജ്യത്ത് വാക്സിൻ കുത്തിവെയ്പ്പ് സ്വീകരിച്ചു. വാക്സിൻ മറ്റ് രാജ്യങ്ങൾക്ക് നൽകി സഹായിക്കാനും ഇന്ത്യയ്ക്ക് കഴിഞ്ഞു. പ്രതിസന്ധിയിൽ ഇന്ത്യ മറ്റ് രാജ്യങ്ങൾക്ക് സഹായകമായി. ഇന്ത്യയുടെ വാക്സിനേഷൻ യജ്ഞം ലോകരാജ്യങ്ങൾക്ക് തന്നെ മാതൃകയായി. ഇതിനോടകം തന്നെ നിരവധി രാജ്യങ്ങളാണ് ഇന്ത്യയോട് വാക്സിൻ ആവശ്യപ്പെട്ടിരിക്കുന്നതെന്നും അദ്ദേഹം വ്യക്തമാക്കി.
ബോർഡർ ഗവാസ്കർ ടെസ്റ്റ് സീരിസ് വിജയിച്ച ഇന്ത്യൻ ക്രിക്കറ്റ് താരങ്ങളെയും പ്രധാനമന്ത്രി അഭിനന്ദിച്ചു. ഇന്ത്യയുടേത് ഒത്തൊരുമയുടേയും കഠിനാധ്വാനത്തിന്റേയും വിജയമാണെന്ന് അദ്ദേഹം പറഞ്ഞു.
