ന്യൂഡൽഹി: രാജ്യത്ത് വിവിധ മേഖലകളിൽ സ്ത്രീകളുടെ പങ്കാളിത്തം വർധിച്ചതായി പ്രധാനമന്ത്രി നരേന്ദ്ര മോദി. വ്യത്യസ്ത മേഖലകളിൽ സ്ത്രീകൾ കരസ്ഥമാക്കിയ നേട്ടങ്ങളെ കുറിച്ചും പ്രധാനമന്ത്രി പറഞ്ഞു. 73 – ാമത് മൻ കീ ബാത്തിൽ ജനങ്ങളെ അഭിസംബോധന ചെയ്യുകയായിരുന്നു അദ്ദേഹം.
അമേരിക്കയിലെ സാൻഫ്രാൻസിസ്കോയിൽ നിന്നും ബംഗളൂരുവിലേക്ക് 10,000 ത്തിലേറെ കിലോമീറ്റർ ദൂരം വരുന്ന വിമാന യാത്ര വിജയകരമായി പൂർത്തിയാക്കിയ എയർ ഇന്ത്യയുടെ വനിതാ പൈലറ്റുമാരെയും ക്യാബിൻ ക്രൂവിനെയും അദ്ദേഹം അഭിനന്ദിച്ചു. ജനുവരി 11 നാണ് 225 പേരുമായി ബംഗളൂരുവിലെ കെംപ ഗൗഡ വിമാനത്താവളത്തിൽ എയർ ഇന്ത്യയുടെ ഏറ്റവും ദൂരമേറിയ ഡയറക്ട് റൂട്ട് ഫ്ളൈറ്റ് ലാൻഡ് ചെയ്തത്. വനിതാ പൈലറ്റുകളാണ് വിമാനം പറത്തിയിരുന്നത്.
റിപ്പബ്ലിക് ദിന പരേഡിൽ രണ്ടു വനിതാ ഐഎഎഫ് ഉദ്യോഗസ്ഥർ ചിത്രം സൃഷ്ടിച്ചതിന് രാജ്യം സാക്ഷ്യം വഹിച്ചു. ഏത് മേഖലയിലും സ്ത്രീകളുടെ പങ്കാളിത്തം വർധിക്കുന്നുവെന്നതിന്റെ തെളിവാണിതെന്ന് പ്രധാനമന്ത്രി വ്യക്തമാക്കി. റിപ്പബ്ലിക് ദിനത്തോടനുബന്ധിച്ച് നടക്കുന്ന പരേഡിൽ പങ്കെടുക്കുന്ന ആദ്യത്തെ വനിതാ യുദ്ധ പൈലറ്റായി ഭവാന കാന്തും രാജ്പഥിൽ നടന്ന ഫ്ളൈപാസ്റ്റിന് നേതൃത്വം നൽകിയ ആദ്യ വനിതയായി സ്വാതി റാത്തോഡും ചരിത്രത്തിൽ ഇടം നേടി.
