അഹമ്മദാബാദ് : നാണക്കേടിന്റെ പുതിയ റെക്കോഡ് സ്വന്തമാക്കി ഇന്ത്യൻ നായകൻ വിരാട് കോഹ് ലി . നിലവില്‍ ക്രിക്കറ്റില്‍ സജീവമായ ഇന്ത്യന്‍ താരങ്ങളില്‍ ഏറ്റവും കൂടുതല്‍ പൂജ്യത്തിന് പുറത്തായ താരമെന്ന നാണക്കേടാണ് കോഹ് ലിയെ തേടിയെത്തിയത്. ഇംഗ്ലണ്ടിനെതിരായ ടെസ്റ്റ് പരമ്പരയിലെ നാലാം മത്സരത്തിൽ റണ്‍സൊന്നുമെടുക്കാതെ പുറത്തായതോടെയാണ് കോഹ് ലി നാണക്കേടിന്റെ റെക്കോഡിലെത്തിയത്.
പരമ്പരയിൽ ഇത് രണ്ടാം തവണയാണ് ഇന്ത്യൻ നായകൻ പൂജ്യത്തിന് കൂടാരം കയറുന്നത്. ഇന്ന് അഹമ്മദാബാദില്‍ ബെന്‍ സ്റ്റോക്‌സിന് മുന്നിൽ കീഴടങ്ങിയ കോഹ് ലി, ചെന്നൈയിൽ നടന്ന മത്സരത്തിൽ റൺസെടുക്കാതെ മൊയീന്‍ അലിയുടെ പന്തില്‍ ബൗള്‍ഡായിരുന്നു. ഇത് 12-ാം തവണയാണ് കോഹ്ലി ടെസ്റ്റ് ക്രിക്കറ്റില്‍ റണ്‍സെടുക്കാതെ പുറത്താവുന്നത്. ഇന്ത്യന്‍ ടീമിന്റെ നായകനായ ശേഷം എട്ടാം തവണയാണ് താരം പൂജ്യത്തിന് പുറത്താവുന്നത്. 7 തവണ പുറത്തായ ധോണിയെയാണ് ഇക്കാര്യത്തിൽ കോഹ്ലി മറികടന്നത്.
ലോക ടെസ്റ്റ് ചാംപ്യന്‍ഷിപ്പില്‍ ഏറ്റവും കൂടുതല്‍ തവണ പുറത്തായ ഇന്ത്യന്‍ താരവും കോഹ് ലി തന്നെയാണ്. നാല് തവണയാണ് ചാംപ്യൻഷിപ്പിൽ കോഹ് ലി പൂജ്യത്തിന് പുറത്തായത്. അജിങ്ക്യ രഹാനെ, ചേതേശ്വര്‍ പൂജാര എന്നിവര്‍ രണ്ട് തവണ റൺസെടുക്കാതെ പുറത്തായിട്ടുണ്ട്.
