ഇംഗ്ലണ്ടിനെയും മുട്ടുകുത്തിച്ച് ഇന്ത്യയുടെ അശ്വമേധം; ലോക ടെസ്റ്റ് ചാമ്പ്യൻഷിപ്പ് ഫൈനലിന് യോഗ്യത നേടി

അഹമ്മദാബാദ്: ലോക ടെസ്റ്റ് ചാമ്പ്യൻഷിപ്പ് ഫൈനലിന് യോഗ്യത നേടി ഇന്ത്യ. ഇംഗ്ലണ്ടിനെതിരായ നാല് മത്സര പരമ്പര 3-1ന് സ്വന്തമാക്കിയാണ് ഇന്ത്യ കലാശപ്പോരാട്ടത്തിന് യോഗ്യത നേടിയത്. പോയിന്റ് പട്ടികയിൽ 520 പോയിന്റുമായി ഒന്നാം സ്ഥാനക്കാരായാണ് ഇന്ത്യ ഫിനിഷ് ചെയ്തത്.

6 സീരിസുകളിൽ 12 വിജയവും 4 തോൽവിയും ഒരു സമനിലയുമായാണ് ഇന്ത്യ പോയിന്റ് പട്ടികയുടെ തലപ്പത്ത് എത്തിയത്. 420 പോയിന്റുമായി ന്യൂസിലൻഡാണ് രണ്ടാം സ്ഥാനത്ത്. 5 സീരീസുകളിൽ 7 ജയവും 4 തോൽവിയുമാണ് കീവീസിന്റെ അക്കൗണ്ടിലുള്ളത്. ഇംഗ്ലണ്ടിനെതിരായ നാലാം ടെസ്റ്റിൽ ഇന്ത്യ വിജയിച്ചതോടെ ഓസ്‌ട്രേലിയ ഫൈനൽ കാണാതെ പുറത്തായി.

എല്ലാ ടെസ്റ്റ് പരമ്പരക്കും 120 പോയിന്റാണ് കണക്കാക്കുന്നത്. മത്സരങ്ങളുടെ എണ്ണത്തിന്റെ അടിസ്ഥാനത്തിൽ പോയിന്റ് തുല്യമായി വീതിക്കപ്പെടും. ഉദാഹരണത്തിന് ഇന്ത്യ-വെസ്റ്റ് ഇൻഡീസ് പരമ്പരയിൽ രണ്ട് മത്സരങ്ങളാണുള്ളത്. വിജയിക്കുന്ന ടീമിന് 60 പോയിന്റ് ലഭിക്കും. എന്നാൽ 5 മത്സരങ്ങളുള്ള പരമ്പരയിൽ ഓരോ മത്സരത്തിനും 24 പോയിന്റ് (24×5=120) വീതമാകും ലഭിക്കുക. സമനില ആണെങ്കിൽ ആകെ പോയിന്റിന്റെ മൂന്നിൽ ഒന്ന് പോയിന്റും ലഭിക്കും.