പുതുച്ചേരി: കോൺഗ്രസ്സ് സർക്കാറിനെ താഴെയിട്ട പടലപ്പിണക്കങ്ങൾ മുൻ മുഖ്യമന്ത്രി നാരായണ സ്വാമിക്ക് നേരേയും തിരിയുന്നു. വരാനിരിക്കുന്ന നിയമസഭാ തെരഞ്ഞെടുപ്പിൽ വി.നാരായണസ്വാമിക്ക് സീറ്റ് നൽകേണ്ടതില്ലെന്ന നിലപാടിലാണ് കേന്ദ്രനേതൃത്വം. പുതുച്ചേരിയിൽ കൂടുതൽ പേർ കോൺഗ്രസ്സ് വിടുമെന്ന പേടിയാണ് നാരായണസ്വാമിക്ക് അവസരം നൽകാത്തതിന് പിന്നിലെന്നാണ് ഒരു വിഭാഗം പറയുന്നത്. ആദ്യ ഘട്ട സ്ഥാനാർത്ഥി പട്ടിക മാത്രമാണ് പുറത്തിറക്കിയതെന്നതുമാത്രമാണ് നാരായണസ്വാമി ക്യാമ്പിന്റെ പ്രത്യാശ.
നാരായണസ്വാമിയോട് അനീതി കാട്ടിയെന്നും മന്ത്രിസഭ താഴെപോകാതിരിക്കാൻ കിണഞ്ഞു പരിശ്രമിച്ച നേതാവാണ് നാരായണ സ്വാമിയെന്നുമാണ് കോൺഗ്രസ്സ് അണികൾ പറയുന്നത്. എന്നാൽ ബി.ജെ.പിയുടെ തന്ത്രങ്ങൾ മുൻകൂട്ടി അറിയാൻ നാരായണസ്വാമിക്ക് സാധിച്ചില്ലെന്ന് ഡി.എം.കെ ആരോപിക്കുന്നതും കോൺഗ്രസ്സ് കേന്ദ്ര നേതൃത്വം വിശ്വാസത്തിലെടുത്തിരിക്കുകയാണ്. വീണ്ടും മുഖ്യമന്ത്രി എന്ന നിലയിൽ പുതുച്ചേരി കോൺഗ്രസ്സിന് മുന്നോട്ട് വെയ്ക്കാൻ മറ്റൊരു നേതാവി ല്ലെന്നതും പ്രശ്നമായി തുടരുകയാണ്.
