ആലപ്പുഴ: എൻഫോഴ്സ്മെന്റ് ഡയറക്ടറേറ്റിനെ വെല്ലുവിളിച്ച് ധനമന്ത്രി തോമസ് ഐസക്. കിഫ്ബിയുമായി ബന്ധപ്പെട്ട എല്ലാ ഉത്തരവാദിത്വങ്ങളും താൻ ഏറ്റെടുക്കുന്നു. തന്നെ അറസ്റ്റ് ചെയ്യാമെങ്കിൽ ചെയ്തോളൂ. ഭീഷണിയ്ക്ക് വഴങ്ങില്ലെന്നും തോമസ് ഐസക് പ്രതികരിച്ചു.
കിഫ്ബിയ്ക്കെതിരായ ഇഡി അന്വേഷണം തെരഞ്ഞെടുപ്പ് മുന്നിൽക്കണ്ടുകൊണ്ടുള്ള പ്രഹസനമാണ്. ഈ പ്രഹസനത്തിന്റെ പേരിൽ ചില ഉന്നത ഉദ്യോഗസ്ഥരെ അറസ്റ്റ് ചെയ്യാൻ ഇഡിയുടെ നീക്കമുണ്ട്. കിഫ്ബി മോഡലിൽ കേന്ദ്രസർക്കാർ രൂപീകരിക്കുന്ന ഡവലപ്മെന്റ് ഫിനാൻഷ്യൽ ഇൻസ്റ്റിറ്റിയൂഷനെ സിബിഐ അടക്കമുള്ള അന്വേഷണ ഏജൻസികളുടെ പരിധിയിൽ നിന്ന് ഒഴിവാക്കുകയാണെന്നും തോമസ് ഐസക് കൂട്ടിച്ചേർത്തു.
അതേസമയം കിഫ്ബി ഇടപാടുമായി ബന്ധപ്പെട്ട് മൊഴി നൽകാൻ തയ്യാറാകാത്ത സിഇഒ, ഡപ്യൂട്ടി മാനേജിങ് ഡയറക്ടർ എന്നിവർക്ക് കള്ളപ്പണം വെളുപ്പിക്കൽ നിരോധന നിയമ പ്രകാരം നോട്ടീസ് നൽകാൻ എൻഫോഴ്സ്മെന്റ് ഒരുങ്ങുകയാണ്. മൊഴി നൽകാനായി കിഫ്ബി ഉദ്യോഗസ്ഥർക്ക് രണ്ട് തവണ നോട്ടീസ് നൽകിയെങ്കിലും ഹാജരാകാതിരുന്ന സാഹചര്യത്തിലാണ് ഇഡിയുടെ നീക്കം.
