സൗന്ദര്യവും ആരോഗ്യവും സംരക്ഷിക്കുന്നതില് മുന്നിലാണ് തേനിന്റെ സ്ഥാനം. ഏറെ ആരോഗ്യപ്രദമായ ഭക്ഷ്യ പദാര്ത്ഥം കൂടിയാണിത്. ആരോഗ്യം സംരക്ഷിക്കാന് ആഗ്രഹിക്കുന്നവര്ക്കും പ്രിയപ്പെട്ട ഒന്നാണിത്. ശരീരഭാരം കുറയ്ക്കാനും മുഖസൗന്ദര്യം വര്ധിപ്പിക്കാനുമൊക്കെ തേന് ഉപയോഗപ്പെടുത്തുന്നു. അതേസമയം, ലോകത്തിലെ ഏറ്റവും വില കൂടിയ തേനിനെ കുറിച്ച് അറിയാമോ..ഈ തേന് എവിടെക്കിട്ടുമെന്നോ…അതിന് എന്ത് വിലയുണ്ടെന്നോ അറിയാമോ… ഗിന്നസ് വേള്ഡ് റെക്കോര്ഡിന്റെ ഔദ്യോഗിക വെബ്സൈറ്റ് പ്രകാരം തുര്ക്കിയിലെ സെന്റൗരി തേനാണ് ലോകത്തിലെ ഏറ്റവും വില കൂടിയ തേന്. ഒരു കിലോഗ്രാമിന് 8.6 ലക്ഷം രൂപയാണ് ഇതിന്റെ വില.
രുചിയുടെ കാര്യത്തിലും ഗുണമേന്മയുടെ കാര്യത്തിലും വിപണിയില് നിന്ന് ലഭിക്കുന്ന പരമ്പരാഗത തേനില് നിന്നും ഏറെ വ്യത്യസ്തമാണ് സെന്റൗരി. വര്ഷത്തില് ഒരിക്കല് മാത്രം വിളവെടുക്കുന്നു എന്ന പ്രത്യേകതയും സെന്റൗരി തേനിനുണ്ട്. സമുദ്ര നിരപ്പില് നിന്നും 2,500 മീറ്റര് ഉയരത്തില് സ്ഥിതി ചെയ്യുന്ന സെന്റൗരിയിലെ ഗുഹയില് നിന്നാണ് ഈ തേന് ഉത്പാദിപ്പിക്കുന്നത്. അതിനാലാണ് സെന്റൗരി തേന് എന്ന പേരും ലഭിച്ചത്. ആരോഗ്യ ഗുണങ്ങള് ഏറെയുള്ള ഒന്നാണ് തേന്. ധാരാളം ആന്റിഓക്സിഡന്റുകളും വൈറ്റമിനുകളും ധാതുക്കളുമെല്ലാം അടങ്ങിയ തേനിന് ശരീരത്തിന് സ്വാഭാവിക പ്രതിരോധശേഷി നല്കാനും കഴിവുണ്ട്.
കഫക്കെട്ടിനുള്ള നല്ലൊരു മരുന്നു കൂടിയാണ്. തേനിലെ ഫ്ളേവനോയ്ഡുകളാണ് രോഗപ്രതിരോധശേഷി നല്കുന്നത്. മധുരമുണ്ടെങ്കിലും ഗ്ലൈസമിക് ഇന്ഡെക്സ് കുറഞ്ഞതായതു കൊണ്ടുതന്നെ ഇത് പ്രമേഹരോഗികള്ക്കും പൊതുവേ ആരോഗ്യകരമാണ്. കൂടാതെ കൊളസ്ട്രോള് എന്ന ജീവിതശൈലി രോഗത്തെ തേന് വഴി നമുക്ക് ഇല്ലാതാക്കാം. ശരീരത്തിന് ക്ഷീണമകറ്റി ഊര്ജം നല്കാനുളള നല്ലൊരു വഴിയാണ് തേന്. വ്യായാമത്തിനു ശേഷം തേന് ഒരു സ്പൂണ് ചൂടുവെള്ളത്തില് കലര്ത്തി കുടിയ്ക്കുന്നതുമെല്ലാം ഏറെ ഗുണം ചെയ്യും.
