മുംബൈ: ഐ.പി.എല്ലിന് മുന്നേ തന്റെ യുവ നായകനെക്കുറിച്ച് ആവേശത്തോടെ സംസാരിച്ച് ഇംഗ്ലണ്ട് ബാറ്റ്സ്മാൻ. സാം ബില്ലിംഗ്സാണ് ഡൽഹി ക്യാപ്പിറ്റൽസിന്റെ പുതുനായകനായ ഋഷഭ് പന്തിനെ പുകഴ്ത്തിയത്. താൻ ലോകക്രിക്കറ്റിൽ സമീപകാലത്ത് കണ്ട ഏറ്റവും മികച്ച യുവതാരമാണ് പന്തെന്നും ബില്ലിംഗ്സ് പറഞ്ഞു.
ഡൽഹി നിരയിൽ 2016ലും 2017ലും ബില്ലിംഗ്സ് കളിച്ചിരുന്നു. ഇത്തവണ രണ്ട് കോടിക്കാണ് പൊതുലേലത്തിൽ ബില്ലിംഗ്സിനെ ഡൽഹി വീണ്ടും സ്വന്തമാ ക്കിയത്. ഇംഗ്ലണ്ടിന്റെ വിക്കറ്റ് കീപ്പർ ബാറ്റ്സ്മാനായ ബില്ലിംഗ്സ് 3527 റൺസ് അന്താരാഷ്ട്രക്രിക്കറ്റിൽ നേടിയ താരമാണ്. മൂന്ന് വർഷത്തിന് ശേഷം ഐ.പി.എല്ലിൽ മടങ്ങിയെത്താനായതിൽ സന്തോഷമുണ്ടെന്നും ബില്ലിംഗ്സ് പറഞ്ഞു.
മുമ്പ് ഋഷഭ് പന്ത് വൻകിട ബൗളർമാരെ നേരിടുന്നത് കണ്ട് അത്ഭുതപ്പെട്ടിട്ടുണ്ട്. പരിശീലനത്തിനിടയിൽ ക്രിസ് മോറിസിനേയും നഥാൻ കോർട്ടർ നൈലിനേയും അനായാസം നേരിടുന്നത് അത്ഭുതത്തോടെ നോക്കി നിന്നിട്ടുണ്ടെന്നും ബില്ലിംഗ്സ് പറഞ്ഞു. പന്തിന്റെ കീഴിൽ ഡൽഹിയ്ക്ക് ഇത്തവണ കിരീടം നേടാനാകുമെന്ന പ്രതീക്ഷയുണ്ടെന്നും ബില്ലിംഗ്സ് പറഞ്ഞു.
Comments