ചൊവ്വയിൽ മഴവില്ല്: പെഴ്‌സിവറൻസ് പുറത്തുവിട്ട ചിത്രത്തിൽ സംശയവുമായി സോഷ്യൽമീഡിയ, ഉത്തരവുമായി നാസ

വാഷിംഗ്ടൺ: നാസയുടെ ചൊവ്വാ ദൗത്യമായ പെർസിവറൻസ് റോവർ പകർത്തിയ പുതിയ ചിത്രം സോഷ്യൽ മീഡിയയിൽ ചർച്ചയാവുന്നു. ‘ചൊവ്വയിൽ മഴവില്ലോ?’ എന്ന സംശയമാണ് ചിത്രം സോഷ്യൽ മീഡിയയിൽ ചർച്ചയാവാൻ കാരണം. ചൊവ്വയുടെ ഉപരിതലത്തിൽ നിന്നുള്ള ചിത്രത്തിലെ മഴവില്ല് നിറമാണ് സംശയത്തിന് ഇടയാക്കിയത്. ചർച്ച വ്യാപകമായതോടെ പെഴ്‌സിവറൻസ് തന്നെ സംശയത്തിന് ഉത്തരവുമായെത്തി.

ചൊവ്വയിൽ കാണുന്ന മഞ്ഞ നിറത്തിലുള്ള ആകാശത്തിലുള്ളത് മഴവില്ല് അല്ല. ചിത്രം പകർത്തിയ ലെൻസിന്റെ ഗ്ലെയർ ആണെന്ന് നാസ വ്യക്തമാക്കി. ചൊവ്വയിൽ നിന്ന് മഴവില്ല് കാണാൻ സാദ്ധ്യമല്ല. ജലത്തുള്ളികളിൽ തട്ടി പ്രകാശം പ്രതിഫലിക്കുമ്പോഴാണ് മഴവില്ല് ഉണ്ടാകുന്നത്. ഈ പ്രതിഭാസം സംഭവിക്കാൻ മാത്രം ജലം ചൊവ്വയിലില്ലെന്ന് നാസ അറിയിച്ചു.

Many have asked: Is that a rainbow on Mars? No. Rainbows aren't possible here. Rainbows are created by light reflected off of round water droplets, but there isn't enough water here to condense, and it’s too cold for liquid water in the atmosphere. This arc is a lens flare. pic.twitter.com/mIoSSuilJW

— NASA's Perseverance Mars Rover (@NASAPersevere) April 6, 2021

നേരത്തെ പെഴ്‌സിവറൻസ് റെക്കോർഡ് ചെയ്ത ശബ്ദവും ചിത്രങ്ങളുമെല്ലാം നാസ പങ്കുവെച്ചിരുന്നു. ചൊവ്വയിൽ ജീവന്റെ തെളിവുകൾ അന്വേഷിക്കുക എന്നതാണ് പെഴ്‌സിവറൻസിന്റെ ചുമതല. ചൊവ്വയിലേക്ക് നാസ അയച്ചതിൽ ഏറ്റവും നൂതനമായ റോവറാണ് പെർസിവറൻസ്. 2031 വരെ പെർസിവറൻസ് ചൊവ്വയിൽ പര്യവേഷണം തുടരും. ഫെബ്രുവരി 19നാണ് പേടകം ചൊവ്വയിൽ ലാൻഡ് ചെയ്തത്.