ന്യൂഡൽഹി: ഇന്ത്യൻ വ്യോമസേനാ മേധാവി ഫ്രാൻസിലേക്കുള്ള ഔദ്യോഗിക സന്ദർശന ത്തിന് പുറപ്പെട്ടു. എയർ ചീഫ് മാർഷൽ ആർ.കെ.എസ് ബദൗരിയയാണ് ഫ്രാൻസിലേക്കുള്ള അഞ്ച് ദിവസത്തെ സന്ദർശനത്തിനായി പുറപ്പെട്ടത്. ഫ്രഞ്ച് സൈനിക മേധാവി ജനറൽ ഫിലിപ്പെ ലാവിഗ്നെയുടെ ഔദ്യോഗിക ക്ഷണം സ്വീകരിച്ചാണ് സന്ദർശനം.
ഈ മാസം 23 വരെയാണ് വ്യോമസേനാ മേധാവിയുടെ സന്ദർശനം. ഇരുരാജ്യങ്ങളിലെയും വ്യോമസേനകൾ തമ്മിലുളള സഹകരണം കൂടുതൽ ശക്തമാക്കുകയാണ് സന്ദർശനത്തിന്റെ ലക്ഷ്യം. ഫ്രാൻസിലെ മുതിർന്ന സൈനിക നേതൃത്വവുമായി ബദൗരിയ കൂടിക്കാഴ്ച നടത്തും. ഫ്രഞ്ച് വ്യോമതാവളങ്ങളും സൈനിക കേന്ദ്രങ്ങളും അദ്ദേഹം സന്ദർശിക്കും.
ഫ്രാൻസിൽ നിന്ന് സ്വന്തമാക്കിയ റാഫേലിലൂടെ ഇന്ത്യൻ വ്യോമസേനയുടെ ആകാശ കരുത്ത് പതിന്മടങ്ങ് വർദ്ധിച്ചിരിക്കുകയാണ്. ഇതിന്റെ പശ്ചാത്തലത്തിൽ യാത്ര ഏറെ പ്രാധാന്യത്തോടെയാണ് പ്രതിരോധ മന്ത്രാലയം കാണുന്നത്.ഫ്രാൻസിന്റെ വ്യോമസേനാ വിഭാഗവുമായും സൈനിക ഉദ്യോഗസ്ഥരുമായും ബദൗരിയ കൂടിക്കാഴ്ച നടത്തുമെന്നും വ്യോമസേന അറിയിച്ചു.
