കൊല്ലം: ബിജെപി പ്രവർത്തകർ കൊല്ലത്ത് മുഖ്യമന്ത്രിയുടെ കോലം കത്തിച്ചു. കൊടകരക്കേസിൽ പ്രതിയല്ലാത്ത ബിജെപി സംസ്ഥാന അദ്ധ്യക്ഷൻ ചോദ്യം ചെയ്യലിന് ഹാജരാകാൻ പോലീസ് നോട്ടീസ് നൽകിയതിൽ പ്രതിഷേധിച്ചാണിത്. യഥാർത്ഥ പ്രതികളുടെ പങ്ക് ബോദ്ധ്യപ്പെട്ടിട്ടും അവർക്കെതിരെ കേസെടുക്കാതെയുള്ള നിലപാടാണ് പോലീസ് സ്വീകരിച്ചിരിക്കുന്നതെന്ന് നേതാക്കൾ പറഞ്ഞു.
ഫോൺരേഖകൾ പരിശോധിച്ച് അന്വേഷണം നടത്തുന്നത് കേസ് അട്ടിമറിക്കാനും, പാർട്ടിയേയും അദ്ധ്യക്ഷനെയും തേജോവധം ചെയ്യാനുമാണെന്നും നേതാക്കൾ ആരോപിച്ചു. ചിന്നക്കട ബസ്ബേയിൽ നടന്ന പ്രതിഷേധപരിപാടി ജില്ലാ ജനറൽ സെക്രട്ടറി വെള്ളിമൺ ദിലീപാണ് ഉദ്ഘാടനം ചെയ്തത്. ജില്ലാ നേതാക്കളായ ബി.ശ്രീകുമാർ, ജി. ഉദയകുമാർ, സുരാജ്, താമരക്കുളം പ്രണവ് തുടങ്ങിയവർ പങ്കെടുത്തു.
അതേസമയം കരിപ്പൂർ സ്വർണ്ണക്കടത്ത് കേസിൽ നിന്നും ശ്രദ്ധ തിരിക്കാനുള്ള സിപിഎം നീക്കമാണ് ചോദ്യം ചെയ്യലെന്ന വിമർശനവും ഉയരുന്നുണ്ട്. കേസിനെ നിയമപരമായും രഷ്ട്രീയമായും നേരിടാനാണ് പാർട്ടി തീരുമാനമെന്ന് കെ സുരേന്ദ്രൻ വ്യക്തമാക്കിയിരുന്നു. അതിനിടെ സുരേന്ദ്രന് ഐക്യദാർഢ്യം പ്രഖ്യാപിച്ച് സെക്രട്ടറിയേറ്റിലേക്ക് ബിജെപി മാർച്ച് നടത്തി. സപിഎമ്മിന്റെ ഫാസിസത്തിനും വേട്ടയാടലിനും എതിരെയായിരുന്നു പ്രതിഷേധം.
