തിരുവനന്തപുരം : സംസ്ഥാനത്ത് മൂന്ന് പേർക്ക് കൂടി സിക്ക വൈറസ് സ്ഥിരീകരിച്ചു. 46 വയസുള്ള പുരുഷനും ഒരു വയസ് 10 മാസം പ്രായമുള്ള കുഞ്ഞിനും 29 വയസുള്ള ആശുപത്രി ജീവനക്കാരിക്കുമാണ് രോഗമുള്ളതായി കണ്ടെത്തിയത്. ഇതോടെ ആകെ രോഗം ബാധിച്ചവരുടെ എണ്ണം 18 ആയി.
ആരോഗ്യമന്ത്രി വീണാ ജോർജ് ആണ് ഇക്കാര്യം അറിയിച്ചത്. പുതുതായി രോഗം സ്ഥിരീകരിച്ചവർ തിരുവനന്തപുരം സ്വദേശികളാണ്. രോഗലക്ഷണങ്ങൾ പ്രകടമായതിനെ തുടർന്ന് സ്വകാര്യ ആശുപത്രിയിൽ ചികിത്സ തേടിയ മറ്റ് രണ്ട് പേരുടെയും, ജീവനക്കാരുടെയും സാമ്പിളുകൾ കോയമ്പത്തൂരിലെ ലാബിലേക്ക് അയച്ചിരുന്നു. ഇവിടെ നടത്തിയ പരിശോധനയിലാണ് വൈറസ് ബാധയുള്ളതായി കണ്ടെത്തിയത്. മൂന്നാം ഘട്ടമായി അയച്ച എട്ട് സാമ്പിളുകളിലാണ് രോഗം സ്ഥിരീകരിച്ചവർ ഉൾപ്പെടുന്നത്.
അതേസമയം രണ്ടാംഘട്ടത്തിൽ അയച്ച 27 സാമ്പിളുകളിൽ 26 എണ്ണവും നെഗറ്റീവ് ആയി.
