ലണ്ടൻ: കൊറോണ നിയന്ത്രണങ്ങൾ പൂർണ്ണമായും പിൻവലിക്കാനൊരുങ്ങി ബ്രിട്ടൻ. ബ്രിട്ടീഷ് പ്രധാനമന്ത്രി ബോറിസ് ജോൺസനാണ് ഇക്കാര്യം ഔദ്യോഗികമായി അറിയിച്ചത്.
‘പൊതുസമൂഹത്തിലെ നിയന്ത്രണങ്ങൾ ഒഴിവാക്കുകയാണ്. മാസ്ക് ധരിക്കലും സാമൂഹിക അകലം പാലിക്കലും ജനങ്ങൾക്ക് ഇനി സ്വയം തീരുമാനിക്കാം. വീട്ടിലിരുന്ന് ചെയ്യുന്ന ജോലികളെ ഓഫീസുകളിലേക്ക് മാറ്റാൻ ഇനി നിയന്ത്രണങ്ങളില്ല. യാത്രാ നിയന്ത്രണങ്ങളും പൂർണ്ണമായും പിൻവലിക്കുകയാണ്.’ ബോറിസ് ജോൺസൻ മാദ്ധ്യമങ്ങളോടായി പറഞ്ഞു.
ഡെൽറ്റാ വൈറസ് ബാധ സമൂഹത്തിലുണ്ട്. നിരവധി പേർ ആശുപത്രിയിലുമുണ്ട്. മരണങ്ങളും നടക്കുന്നുണ്ട്. എന്നാൽ കഴിഞ്ഞ വർഷം ഇതേ സമയത്തേക്കാൾ വ്യാപന തോത് താരതമ്യേന ഇപ്പോൾ കുറവാണ്. പൊതുസമൂഹം സ്വയം ജാഗ്രതപാലിക്കലാണ് അഭികാമ്യം. എല്ലാ മേഖലകളും സജീവമാകേണ്ടത് രാജ്യത്തിന്റെ മുന്നേറ്റത്തിന് ആവശ്യവുമാണെന്നും ജോൺസൻ പറഞ്ഞു.
ഇതിനിടെ മാസ്ക് ധരിക്കൽ പൂർണ്ണമായും ഒഴിവാക്കുന്നത് ശരിയല്ലെന്ന അഭിപ്രായമാണ് ആരോഗ്യവകുപ്പിനുള്ളത്. ഹാളുകളിലും ഓഫീസുകളിലും മാസ്ക് ഉപയോഗിക്കണമെന്നാണ് ആവശ്യമുയരുന്നത്. വൈറസ് വ്യാപനം രൂക്ഷമാണെന്നും വിദഗ്ധർ ചൂണ്ടിക്കാട്ടുന്നുണ്ട്. ദിവസേനയുള്ള രോഗവ്യാപനം 30,000 ആണെന്നും ആരോഗ്യവകുപ്പ് അറിയിച്ചു.
