ശസ്ത്രക്രിയയ്ക്കായി സ്വരൂപിച്ച പണം എലികള്‍ കരണ്ട് നശിപ്പിച്ചു. തെലങ്കാനയിലാണ് വേദനജനകമായ സംഭവം നടന്നത്. ഇന്ദിരാനഗര്‍ സ്വദേശിയും പച്ചക്കറി കച്ചവടക്കാരനുമായ റെഡ്യ നായിക്കിന്റെ പണമാണ് എലികള്‍ നശിപ്പിച്ചത്. കഴിഞ്ഞ ദിവസം പണം എണ്ണിത്തിട്ടപ്പെടുത്താനായി അലമാര തുറന്ന് നോക്കിയപ്പോഴാണ് ഞെട്ടിക്കുന്ന കാഴ്ച റെഡ്യ കണ്ടത്.
തുണിസഞ്ചിയും അതിനുള്ളിലെ പണവും എലികള്‍ പൂര്‍ണമായും നശിപ്പിച്ചിരിക്കുന്നു. നോട്ടുകളുടെ ചില ഭാഗങ്ങള്‍ മാത്രമാണ് ലഭിച്ചത്. വയറ്റിലെ ശസ്ത്രക്രിയക്കായി സൂക്ഷിച്ചതായിരുന്നു പണം. ജോലി ചെയ്തുണ്ടാക്കിയതും ബന്ധുക്കള്‍ നല്‍കിയതുമായ പണമാണ് ഈ അവസ്ഥയിലായത്. ഇതുമായി ബാങ്കുകളെ സമീപിച്ചെങ്കിലും അവരെല്ലാം കൈയ്യൊഴിഞ്ഞു. നമ്പരിന്റെ ഭാഗമില്ലാത്തതിനാല്‍ പകരം നോട്ടുകള്‍ നല്‍കാനാവില്ലെന്നും.,പകരം റിസര്‍വ് ബാങ്കിനെ സമീപിക്കാനുമാണ് ബാങ്കുകളുടെ നിര്‍ദേശം.
റെഡ്യ നായിക്കിന്റെ വയറ്റിനുള്ളില്‍ മുഴ വളരുന്നുവെന്ന വിവരം കുറച്ചുനാള്‍ മുമ്പാണ് വ്യക്തമായത്. തുടര്‍ന്ന് സ്വകാര്യ ആശുപത്രിയെ സമീപിച്ചപ്പോള്‍ ശസ്ത്രക്രിയ നടത്തണമെന്നും അതിന് നാലുലക്ഷത്തോളം രൂപ വേണമെന്നും പറഞ്ഞു. ഇതിനനുസരിച്ച് സ്വരൂപിച്ച പണമാണ് ഇപ്പോള്‍ എലികള്‍ നശിപ്പിച്ചത്.
Comments