ടോക്കിയോ: മിക്സഡ് വിഭാഗത്തിലെ പ്രതീക്ഷയും അസ്തമിച്ച് ടീം ഇന്ത്യ. ഷൂട്ടിംഗിൽ ആദ്യമായി ഏർപ്പെടുത്തിയ 10 മീറ്റർ എയർ പിസ്റ്റൾ മിക്സഡ് ഇനത്തിൽ നിലവിലെ ലോകചാമ്പ്യന്മാരായ ഇന്ത്യൻ ടീം പുറത്തായി. അഭിഷേക് വർമ-യശസ്വിനി ദേശ്വാൾ സഖ്യമാണ് ആദ്യ റൗണ്ടിൽ തന്നെ പുറത്തായത്. ഇവർക്കൊപ്പം സൗരഭ് ചൗധരി-മനു ഭേക്കർ സഖ്യവും ഫൈനലിന് യോഗ്യത നേടാനാകാതെ പുറത്തായി.
ആദ്യ റൗണ്ടിൽ 582 പോയിന്റുകളുമായി മുന്നേറിയ സൗരഭ്- മനു സഖ്യം ഫൈനൽ ബർത്തിനായുള്ള പോരാട്ടത്തിൽ 380 പോയിന്റിലേക്ക് വീണത് വിനയായി. ഇതേ ഇനത്തിൽ അഭിഷേക്-യശസ്വിനി സഖ്യം ആദ്യ റൗണ്ടിൽ മുന്നേ പുറത്തായി. കുറഞ്ഞത് മൂന്ന് സ്ഥാനം നേടിയാൽ മാത്രമേ അടുത്ത റൗണ്ടിലേക്ക് കയറാനാകൂ. ഈ കടമ്പ താരങ്ങൾക്ക് കടക്കാനായില്ല.
ഇനി ഏക പ്രതീക്ഷ പത്തുമീറ്റർ എയർ റൈഫിൾ ഇനത്തിലാണ്. മിക്സഡ് ഇനത്തിൽ ഇളവേണിൽ വാളറിവൻ-ദിവ്യാൻഷ് പൻവാർ, ദീപക് കുമാർ-അഞ്ജും മൊദ്ഗിൽ സഖ്യങ്ങളുമാണ് ഇന്ന് അവസാന ഇനത്തിൽ ഇറങ്ങുന്നത്.
