ന്യൂഡൽഹി: വിപണിയിലെത്തും മുമ്പേ വാഹനപ്രേമികൾക്കിടയിൽ തരംഗം തീർത്ത ഇലക്ട്രിക് സ്കൂട്ടർ പുറത്തിറക്കി ഓല. എസ് 1 ഇലക്ട്രിക് സ്കൂട്ടർ എന്നാണ് വാഹനത്തിന്റെ പേര്.കമ്പനിയുടെ രാജ്യത്തെ ആദ്യ ഇലക്ട്രിക് സ്കൂട്ടറാണിത്. 99,999 രൂപയാണ് പ്രാരംഭ എക്സ് ഷോറും വില.കമ്പനി ഇതിനോടകം തന്നെ സ്കൂട്ടറിനുള്ള ബുക്കിങ്ങ് ആരംഭിച്ചിരുന്നു. 499 രൂപ അടച്ച് സ്കൂട്ടർ ഓൺലൈനായി ബുക്ക് ചെയ്യാനായിരുന്നു കമ്പനി നിർദ്ദേശിച്ചിരുന്നത്.ഇതിന് മികച്ച പ്രതികരണമായിരുന്നു വാഹനപ്രേമികളിൽ നിന്നുണ്ടായത്.
ആകർഷകമായ 10 നിറങ്ങളിലാണ് ഓലയുടെ ഇലക്ട്രിക് സ്കൂട്ടർ വിപണിയിൽ എത്തുക. മൂന്ന് പാസ്ടെൽ, മൂന്ന് മെറ്റാലിക്, മൂന്ന് മാറ്റ് ഫിനിഷിങ്ങിലുള്ളതുമാണ് നിറങ്ങൾ. ചുവപ്പ്,നീല,മഞ്ഞ,കറുപ്പ്,പിങ്ക്,സിൽവർ,ഗ്രേ എന്നിവയാണ് ഓല സ്കൂട്ടറുകളുടെ പ്രധാനമായ നിറങ്ങൾ. ഇത് മാറ്റ്, മെറ്റാലിക് തുടങ്ങിയ ഫിനിഷിങ്ങിൽ ലഭ്യമാകും.
മികച്ച സ്പീഡ്, വലിയ ബൂട്ട്സ്പേസ്, നൂതന സാങ്കേതികവിദ്യ എന്നിവയാണ് സ്കൂട്ടറിന്റെ പ്രധാന സവിശേഷതകളായി കമ്പനി അവകാശപ്പെടുന്നത്. 18 മിനിറ്റ് കൊണ്ട് 50 ശതമാനം ബാറ്ററി ചാർജിങ് ശേഷിയാണ് വാഹനത്തിന്റെ പ്രത്യേകത. 75 കിലോമീറ്റർ ദൂരം ഈ ചാർജിങ്ങിൽ സഞ്ചരിക്കാം. ഒറ്റത്തവണ ബാറ്ററി പൂർണമായി ചാർജ് ചെയ്താൽ 150 കിലോമീറ്റർ വരെ സഞ്ചരിക്കാം.3.92 കെ.ഡബ്ല്യു.എച്ച് ലിഥിയം-അയൺ ബാറ്ററി പായ്ക്ക് ഉപയോഗിച്ച് ജോടിയാക്കിയ 8.5 കെ.ഡബ്ല്യു ഇലക്ട്രിക് മോട്ടോറാണ് ഇലക്ട്രിക് സ്കൂട്ടറിന് കരുത്ത് പകരുന്നത്. ബാറ്ററി പാക്ക് നീക്കം ചെയ്യാനാവില്ല.
ഡീലർഷിപ്പുകളിലൂടെയുള്ള പരമ്പരാഗത വിൽപ്പനയ്ക്ക് പകരം വാഹനം ഉപയോക്താക്കളുടെ വീട്ടുപടിക്കൽ എത്തിക്കുന്ന വിൽപ്പന രീതിയായിരിക്കും ഓല സ്വീകരിക്കുക. ഇത് ഉപയോക്താക്കളുമായി ഊഷ്മള ബന്ധം സ്ഥാപിക്കുന്നതിൽ ഗുണം ചെയ്യുമെന്നാണ് വിലയിരുത്തുന്നത്.
Comments