ന്യൂഡൽഹി: 26 വർഷത്തെ സേവനത്തിനുശേഷം, കേണൽ (ടൈം സ്കെയിൽ) റാങ്കിലേക്ക് അഞ്ച് വനിതാ ഓഫീസർമാരുടെ സ്ഥാനക്കയറ്റം. ഇന്ത്യൻ സൈന്യത്തിന്റെ സെലക്ഷൻ ബോർഡിന്റെയാണ് തീരുമാനം.
കോർപ്സ് ഓഫ് സിഗ്നൽസിൽ നിന്നുള്ള ലെഫ്റ്റനന്റ് കേണൽ സംഗീത സർദാന, ഇഎംഇ കോർപ്സിൽ നിന്ന് ലെഫ്റ്റനന്റ് കേണൽ സോണിയ ആനന്ദ്, ലഫ്റ്റനന്റ് കേണൽ നവനീത് ദുഗൽ, കോർപ്സ് ഓഫ് എഞ്ചിനീയർമാരിൽ നിന്ന് ലെഫ്റ്റനന്റ് കേണൽ റീനു ഖന്ന, ലെഫ്റ്റനന്റ് കേണൽ റിച്ച സാഗർ എന്നിവരാണ് കേണൽ ടൈം സ്കെയിൽ റാങ്കിലേക്ക് തിരഞ്ഞെടുക്കപ്പെട്ട അഞ്ച് വനിതാ ഓഫീസർമാർ. പ്രതിരോധ മന്ത്രാലയമാണ് ഇക്കാര്യം അറിയിച്ചത്.
കോർപ്സ് ഓഫ് സിഗ്നൽസ്, കോർപ്സ് ഓഫ് ഇലക്ട്രോണിക് ആൻഡ് മെക്കാനിക്കൽ എഞ്ചിനീയർസ് (ഇഎംഇ), കോർപ്സ് ഓഫ് എഞ്ചിനീയർസ് എന്നിവരോടൊപ്പം സേവനമനുഷ്ഠിക്കുന്ന വനിതാ ഉദ്യോഗസ്ഥക്ക് കേണൽ പദവി നൽകുന്നത് ഇതാദ്യമായാണ്.
മുൻപ്, കേണൽ പദവിയിലേക്കുള്ള സ്ഥാനക്കയറ്റം ആർമി മെഡിക്കൽ കോർപ്സ് (എഎംസി), ജഡ്ജ് അഡ്വക്കേറ്റ് ജനറൽ (ജെഎജി), ആർമി എജ്യുക്കേഷൻ കോർപ്സ് (എഇസി) എന്നിവയിലെ വനിതാ ഉദ്യോഗസ്ഥർക്ക് മാത്രമെ നൽകിയിരുന്നുള്ളു.
ഇന്ത്യൻ ആർമിയുടെ ഭൂരിഭാഗം ശാഖകളിൽ നിന്നുള്ള വനിതാ ഓഫീസർമാർക്ക് സ്ഥിരം കമ്മീഷൻ നൽകാനുള്ള തീരുമാനത്തോടൊപ്പം, ഈ നടപടി ലിംഗ വിവേചനത്തിനെതിരെയുള്ള ഇന്ത്യൻ സൈന്യത്തിന്റെ സമീപനത്തെ എടുത്തുകാട്ടുന്നു.
Comments