തിരുവനന്തപുരം : മുഖ്യമന്ത്രിയ്‌ക്കെതിരെ കെപിസിസി വർക്കിംഗ് പ്രസിഡന്റ് കൊടിക്കുന്നിൽ സുരേഷ് എംപി. മുഖ്യമന്ത്രി യഥാർത്ഥ നവോത്ഥാന നായകനായിരുന്നു എങ്കിൽ മകളെ പട്ടിക ജാതിക്കാരനെക്കൊണ്ട് വിവാഹം കഴിപ്പിക്കണമായിരുന്നുവെന്ന് എം.പി പറഞ്ഞു. എസ് സി – എസ് ടി വികസന ക്ഷേമ ഫണ്ട് തട്ടിപ്പിനെതിരെ ദളിത് ആദിവാസി കോൺഗ്രസ് കോർഡിനേഷൻ കമ്മിറ്റി നടത്തിയ പ്രതിഷേധ ധർണക്ക് നേതൃത്വം നൽകി സംസാരിക്കുകയായിരുന്നു അദ്ദേഹം.
മുഖ്യമന്ത്രി നവോത്ഥാന നായകൻ ആയിരുന്നുവെങ്കിൽ മകളെ പട്ടികജാതിക്കാരന് കെട്ടിച്ചു കൊടുക്കണമായിരുന്നു. പാർട്ടിയിൽ പട്ടികജാതിക്കാരായ എത്രയോ നല്ല ചെറുപ്പക്കാരുണ്ട്.
മുഖ്യമന്ത്രിയുടെ നവോത്ഥാന പ്രസംഗം തട്ടിപ്പാണെന്നും കൊടിക്കുന്നിൽ കുറ്റപ്പെടുത്തി.
പട്ടിക ജാതിക്കാരനായ മന്ത്രിയെ നിയന്ത്രിക്കുന്നതിനായി മനസ്സാക്ഷി സൂക്ഷിപ്പുകാരനെ മുഖ്യമന്ത്രി ഓഫീസിൽ നിയമിച്ചു. മറ്റ് ഓഫീസുകളിലൊന്നും ഈ നിയന്ത്രണമില്ല. കെ രാധാകൃഷ്ണനെ ദേവസ്വം മന്ത്രിയാക്കി നിയമിച്ചത് നവോത്ഥാനമാക്കി മുഖ്യമന്ത്രി ഉയർത്തിക്കാട്ടുകയാണെന്നും എംപി പറഞ്ഞു.
തിരുവനന്തപുരം വെള്ളയമ്പലം അയ്യങ്കാളി പ്രതിമക്ക് മുൻപിലായിരുന്നു പ്രതിഷേധ ധർണ സംഘടിപ്പിച്ചത്.
