മുംബൈ: ലൈംഗിക ഉദ്ദേശ്യമില്ലാതെ കവിളിൽ തലോടുന്നത് കുട്ടികൾക്കെതിരായ ലൈംഗികാതിക്രമത്തിന്റെ പരിധിയിൽ വരില്ലെന്ന് ഹൈക്കോടതി.മുംബൈ ഹൈക്കോടതിയുടേതാണ് ഈ നിരീക്ഷണം.പ്രതിക്ക് കോടതി ജാമ്യം അനുവദിച്ചു.എട്ടുവയസുകാരിയെ ലൈംഗികമായി പീഡിപ്പിച്ചെന്ന കേസിൽ അറസ്റ്റിലായ മുഹമ്മദ് അഹമ്മദുള്ള എന്ന 46 കാരനാണ് ജാമ്യം ലഭിച്ചത്.
ഇറച്ചി വ്യാപാരിയായ ഇയാൾ പെൺകുട്ടിയെ കടയ്‌ക്കകത്തേക്ക് വിളിച്ചുകൊണ്ട് പോവുകയും കവിളിൽ തലോടുകയും ചെയ്തു. അതേസമയം ഇയാളുടെ വസ്ത്രങ്ങൾ അഴിച്ചുമാറ്റുകയും ചെയ്തു. പെൺകുട്ടിയെ അകത്തേക്ക് വിളിച്ച് കൊണ്ട് പേകുന്നത് കണ്ട ഒരു സ്ത്രീ സംഭവസ്ഥലത്തേക്ക് ചെല്ലുകയും കുട്ടിയെ രക്ഷപ്പടുത്തുകയും ആയിരുന്നു
എന്നാൽ ബിസിനസ്സിലെ എതിരാളികൾ തന്നെ കള്ളക്കേസിൽ കുടുക്കിയതാണെന്ന് പ്രതി തന്റെ ജാമ്യാപേക്ഷയിൽ പറഞ്ഞു. ക്രിമിനൽ പശ്ചാത്തലം ഇല്ലാത്ത താൻ വളരെക്കാലമായി ഈ പ്രദേശത്ത് താമസിച്ചുവരികയാണെന്നും അവകാശപ്പെട്ടു.
അതേസമയം ജാമ്യം നൽകുന്നത് സംബന്ധിച്ച കാര്യം മാത്രമാണ് കോടതി ഇപ്പോൾ പരിഗണിച്ചതെന്നും ഈ നിരീക്ഷണം തുടർന്നുള്ള വിചാരണയെയോ മറ്റ് നടപടികളെയോ ഒരു തരത്തിലും ബാധിക്കരുതെന്നും കോടതി നിർദേശിച്ചു.
