വാഷിംഗ്ടൺ: വാഹനങ്ങളുടെ ദിശ നിയന്ത്രിക്കുവാൻ ഉപയോഗിച്ചിരുന്ന സ്റ്റീയറിങ്ങ് വീൽ എല്ലാം ഇനി പഴങ്കഥ. ഇത്തരത്തിലുളള പരമ്പാരഗത സംവിധാനങ്ങളെല്ലാം ഒഴിവാക്കി പുതിയ വൈദ്യുത കാർ വിൽപ്പനയ്ക്കെത്തിക്കുമെന്ന് അമേരിക്കൻ വൈദ്യുത വാഹന നിർമ്മാതാക്കളായ ടെസ്ല. 2023ൽ വാഹനം പുറത്തിറക്കുമെന്നാണ് കമ്പനി ആഹ്വാനം ചെയ്തിരിക്കുന്നത്. ഏകദേശം 18 ലക്ഷമായിരിക്കും വാഹനത്തിന്റെ വില.
ചൈനയിലെ ഷാങ്ഹായി ഗിഗാഫാക്ടറിയിലാവും വാഹനത്തിന്റെ നിർമ്മാണം. ഹാച്ച്ബാക്ക് വിഭാഗത്തിലാണ് കാർ ലഭ്യമാകുക എന്ന് ടെസ്ല സഹസ്ഥാപകൻ എലോൺ മസ്ക് അറിയിച്ചു. ഇതോടൊപ്പം, അമേരിക്കയിൽ വാഹനത്തിനാവശ്യമായ വൈദ്യുതി ഉപഭോക്താക്കൾക്ക് നേരിട്ട് വിൽക്കുവാനും ടെസ്ല ആലോചിക്കുന്നു.
റീട്ടയ്ൽ ഇലക്ട്രിക് പ്രൊവൈഡർ ( ആർ ഇ പി) ആവാനുള്ള അപേക്ഷ ടെക്സസിലെ പബ്ലിക് യൂട്ടിലിറ്റി കമ്മീഷന് ടെസ്ല ഇതിനോടകം തന്നെ സമർപ്പിച്ചു. ഉപസ്ഥാപനമായ ടെസ്ല എനർജി വെഞ്ച്വേഴ്സ് വഴിയാണ് കമ്പനി വൈദ്യുതി ലഭ്യമാക്കാൻ ഒരുങ്ങുന്നത്.
2021ഓടെ ടെസ്ല ഇന്ത്യൻ നിരത്തുകളിൽ എത്തുമെന്നാണ് സുചന. ഇലക്ട്രിക് കാറുകളുടെ വളർച്ചാ സാധ്യത മുന്നിൽ കണ്ട് കഴിഞ്ഞ വർഷം തന്നെ ഇന്ത്യ മോട്ടോഴ്സ് ആൻഡ് എനർജി പ്രൈവറ്റ് എന്ന കമ്പനി സ്ഥാപിച്ചിരുന്നു. ഔദ്യോഗിക പ്രവേശനത്തിനു മുമ്പ് കമ്പനിയ്ക്കായി മുതിർന്ന എക്സിക്യൂട്ടീവുകളെയും നിയമിച്ചു തുടങ്ങി.
