കൊൽക്കത്ത: ഡ്യൂറന്റ് കപ്പ് ഫുട്‌ബോളിൽ കേരള ബ്ലാസ്റ്റേഴ്‌സിന് വിജയ തുടക്കം. ദുർബലരായ ഇന്ത്യൻ നേവിയെ എതിരില്ലാത്ത ഒറ്റ ഗോളിന് പരാജയപ്പെടുത്തിയാണ് ബ്ലാസ്റ്റേഴ്‌സ് സീസണിലെ ആദ്യ മത്സരം പൂർത്തിയാക്കിയത്.
71ാം മിനിറ്റിൽ ഉറുഗ്വേ താരം അഡ്രിയാൻ ലൂണ പെനാൽറ്റിയിലൂടെയാണ് വിജയ ഗോൾ നേടിയത്. മത്സരത്തിലുടനീളം മേധാവിത്വം പുലർത്തിയ ബ്ലാസ്റ്റേഴ്‌സ് ഗോൾ അടിക്കുന്നതിൽ മികവ് കാട്ടിയില്ല.
തുടക്കം മങ്ങിയ നേവി രണ്ടാം പകുതിയിൽ ചില അവസരങ്ങൾ നേടിയെടുക്കുന്നതിൽ വിജയിച്ചെങ്കിലും മുതലാക്കാനായില്ല. നേവിയുടെ ദൽരാജ് സിങ് ബ്ലാസ്റ്റേഴ്‌സിന്റെ ശ്രീക്കുട്ടനെ പെനാൽറ്റി ബോക്‌സിൽ വീഴ്‌ത്തിയതിനെ തുടർന്ന റഫറി സ്‌പോട്ട് കിക്കിലേക്ക് വിരൽചൂണ്ടി. കിക്കെടുത്ത അഡ്രിയാൻ ലൂണയ്‌ക്ക് പിഴച്ചില്ല. ഇതോട ബ്ലാസ്റ്റേഴ്‌സിന് മൂന്ന് പോയിന്റായി. അടുത്ത മത്സരത്തിൽ 15ന് ബ്ലാസ്റ്റേഴ്‌സ് എഫ്‌സി ബംഗളൂരുവിനെ നേരിടും.
