ന്യൂഡൽഹി: വിവിധ സംസ്ഥാനങ്ങളിൽ ആയുർവേദം, യോഗ, പ്രകൃതി ചികിത്സ,യുനാനി,സിദ്ധ തുടങ്ങിയവ പഠിപ്പിക്കുന്ന കോളേജുകൾ ആരംഭിക്കുന്നതിന് കേന്ദ്രം സാമ്പത്തിക സഹായം നൽകുമെന്ന് കേന്ദ്ര ആയുഷ് മന്ത്രി സർബാനന്ദ സോനോവാൾ പറഞ്ഞു.70 കോടി രൂപയാണ് സംസ്ഥാനങ്ങൾക്ക് കേന്ദ്രം ധനസഹായം നൽകുക.
വടക്ക് കിഴക്കൻ സംസ്ഥാനങ്ങളിൽ താരതമ്യേന ആയുഷ് കോളേജുകൾ കുറവാണ്. സാമ്പത്തിക സഹായം ലഭിക്കുന്നതോടെ ഇതിന് ഒരു പരിഹാരം കാണുമെന്നാണ് പ്രതീക്ഷ. ഇത്തരം സ്ഥാപനങ്ങൾക്ക് ആവശ്യമായ അടിസ്ഥാന സൗകര്യങ്ങൾ, കെട്ടിടം,ഫർണീച്ചറുകൾ തുടങ്ങിയവയ്‌ക്കും സഹായം നൽകും. അതേസമയം കോളേജ് ആരംഭിക്കുന്നതിന് ആവശ്യമായ ഭൂമിയും തൊഴിലാളികളെയും അതത് സംസ്ഥാനങ്ങൾ കണ്ടെത്തണമെന്ന് മന്ത്രി കൂട്ടിച്ചേർത്തു.
ആയുഷ് ഇന്ത്യയിൽ മാത്രമല്ല ലോകം മുഴുവൻ പ്രശസ്തമാവണമെന്നാണ് പ്രധാനമന്ത്രി നരേന്ദ്ര മോദിയുടെ ആഗ്രഹം. അതിന് വേണ്ടിയുള്ള അദ്ദേഹത്തിന്റെ പ്രവർത്തനങ്ങൾ വിലമതിക്കാനാവാത്തതാണ്.യോഗയെ ജനകീയമാക്കുന്നതിൽ വലിയ പങ്ക് വഹിച്ചു. ആയുഷിനെ ലോകം ഏറ്റെടുക്കണമെന്ന അദ്ദേഹത്തിന്റെ സ്വപ്‌നം പൂർത്തീകരിക്കാൻ രാജ്യം പരിശ്രമിക്കേണ്ടതുണ്ടെന്നും മന്ത്രി കൂട്ടിച്ചേർത്തു.
