വാഷിംഗ്ടൺ: ലോകത്തിലെ ഏറ്റവും കൂടുതൽ വെളുത്ത നിറമുള്ള പെയിന്റ് കണ്ടുപിടിച്ച് ഗിന്നസ് റെക്കോർഡിൽ ഇടം നേടിയിരിക്കുകയാണ് യുഎസിലെ പർഡ്യൂ സർവകലാശാല ഗവേഷകൻ. മെക്കാനിക്കൽ എഞ്ചിനിയറിങ്ങ് അദ്ധ്യാപകനായ ഷ്യുലിൻ റുവാനാണ് ഈ കണ്ടുപിടിത്തത്തിന് പിന്നിൽ. ആഗോള താപനത്തെ തടയാൻ ഈ പെയിന്റിന് സാധിക്കുമെന്നാണ് പഠനം വ്യക്തമാക്കുന്നത്.
സാധാരണ വെളുപ്പ് നിറത്തിന് 80 മുതൽ 90 ശതമാനം വരെ സൂര്യ രശ്മിയെ മാത്രമേ പ്രതിഫലിപ്പിക്കാൻ സാധിക്കു. എന്നാൽ ഈ പെയിന്റിന് 98.1 ശതമാനം സൂര്യ രശ്മിയെ പ്രതിഫലിപ്പിക്കാനാകും. കൂടാതെ ഇൻഫ്രാറെഡ് കിരണങ്ങൾ പുറപ്പെടുവിക്കാൻ സാധിക്കുന്നതുകൊണ്ടു തന്നെ അന്തരീക്ഷത്തെ ശീതളമാക്കാനും ഈ പെയിന്റിന് കഴിവുണ്ട്. ഇതിലൂടെ എസികളുടെ ഉപയോഗം ഒരു പരിധി വരെ കുറക്കാനാകുമെന്നാണ് ഗവേഷകർ കണക്കുകൂട്ടുന്നത്.
‘1000 ചതുരശ്ര അടിയിൽ പെയിന്റ് ഉപയോഗിക്കുമ്പോൾ, 10 കിലോവാട്ട് കൂളിംഗ് പവറാണ് ലഭിക്കുന്നത്. സാധാരണയായി വീടുകളിൽ കാണപ്പെടുന്ന എസികളിലും ഏകദേശം ഇതേ കൂളിംഗ് പവറാണുള്ളത്’ റുവാൻ പറഞ്ഞു. എസികളുടെ ഉപയോഗം കുറക്കുമ്പോൾ തന്നെ ആഗോള താപനത്തെ നേരിടാൻ ഉള്ള വഴി തെളിയുകയാണെന്നും അദ്ദേഹം കൂട്ടിച്ചേർത്തു.
ഏഴ് വർഷങ്ങൾക്ക് മുൻപാണ് പരീക്ഷണം ആരംഭിച്ചത്. കാലാവസ്ഥാ വ്യതിയാനങ്ങൾ പരീക്ഷണത്തെ ബാധിച്ചു എങ്കിലും ഇത് പൂർത്തീകരിക്കാൻ സാധിച്ചതിന്റെ ആഹ്ലാദത്തിലാണ് റുവാൻ.
