കരിപ്പൂർ: വയനാട് എംപിയും കോൺഗ്രസ് നേതാവുമായ രാഹുൽ ഗാന്ധി ഇന്ന് കേരളത്തിൽ. രാവിലെ എട്ടരയ്ക്ക് കരിപ്പൂരിൽ എത്തുന്ന രാഹുൽ മുതിർന്ന നേതാക്കളുമായി കൂടിക്കാഴ്ച നടത്തും.
കെപിസിസി നേതൃത്വത്തിനെതിരെ മുതിർന്ന നേതാക്കൾ തുടർച്ചയായി പരസ്യമായി വിമർശനങ്ങൾ ഉന്നയിക്കുന്നതിടെയാണ് രാഹുലിന്റെ വരവ്. രാവിലെ 9 മണി മുതൽ 10 മണി വരെ കെപിസിസി പ്രസിഡണ്ട് കെ സുധാകരൻ ഉൾപ്പെടെയുള്ള മുതിർന്ന നേതാക്കളുമായി രാഹുൽ ഗാന്ധി കൂടിക്കാഴ്ച നടത്തും.
കഴിഞ്ഞ ദിവസം രാഷ്ട്രീയകാര്യ സമിതിയിൽ നിന്നും മുൻ കെപിസിസി അധ്യക്ഷൻ കൂടിയായ വിഎം സുധീരൻ രാജിവെച്ചിരുന്നു. ഇതിന് പിന്നാലെ എഐസിസി അംഗത്വവും സുധീരൻ രാജിവെച്ചിരുന്നു. കെപിസിസി പുനസംഘടനയുമായി ബന്ധപ്പെട്ട കൂടിയാലോചനകളിൽ പുതിയ നേതൃത്വം അവഗണിച്ചതിൽ പ്രതിഷേധിച്ചാണ് സുധീരന്റെ രാജി. കെ. സുധാകരനും വിഡി സതീശനും അടങ്ങുന്ന പുതിയ നേതൃത്വത്തിന്റെ ഏകപക്ഷീയ നിലപാടിൽ മറ്റ് മുതിർന്ന നേതാക്കളും ശക്തമായ പ്രതിഷേധത്തിലാണ്. ഇതിനിടയിലാണ് രാഹുലിന്റെ സന്ദർശനം.
എന്നാൽ ചർച്ചകളെക്കുറിച്ച് നേതാക്കൾ കൂടുതൽ കാര്യങ്ങൾ വെളിപ്പെടുത്തിയിട്ടില്ല. രാഹുലിന്റെ മറ്റ് പരിപാടികളെക്കുറിച്ചും കൂടുതൽ വിവരങ്ങൾ പുറത്തുവിട്ടിട്ടില്ല. ഇടഞ്ഞുനിൽക്കുന്ന നേതാക്കളെ അനുനയിപ്പിക്കാനുളള വഴികളാണ് ചർച്ചയിൽ വിഷയമാകുകയെന്നാണ് സൂചന.
Comments