ന്യൂഡൽഹി: രാജ്യത്തെ അടിസ്ഥാന സൗകര്യവികസനത്തിൽ നിർണായക കുതിപ്പ് നൽകുന്ന പിഎം ഗതിശക്തി ദേശീയ മാസ്റ്റർ പ്ലാൻ പ്രധാനമന്ത്രി നരേന്ദ്രമോദി രാജ്യത്തിന് സമർപ്പിച്ചു. അടുത്ത 25 വർഷത്തേക്കുളള പദ്ധതികൾക്കാണ് ഇതിലൂടെ അടിസ്ഥാനമിടുന്നതെന്ന് പ്രധാനമന്ത്രി നരേന്ദ്രമോദി പറഞ്ഞു. ഈ മാസ്റ്റർ പ്ലാൻ 21 ാം നൂറ്റാണ്ടിലേക്കുളള രാജ്യത്തിന്റെ വികസന പദ്ധതികൾക്ക് ഗതിവേഗം പകരുമെന്നും പ്രധാനമന്ത്രി കൂട്ടിച്ചേർത്തു.
പദ്ധതികളുടെ സമയബന്ധിതമായ പൂർത്തീകരണത്തിനും മാസ്റ്റർ പ്ലാൻ സഹായിക്കുമെന്ന് പ്രധാനമന്ത്രി പറഞ്ഞു. പിഎം ഗതിശക്തി പ്ലാൻ രാജ്യത്തെ വികസന പദ്ധതികൾക്ക് കൃത്യമായ ദിശാബോധം നൽകുകയും നിക്ഷേപങ്ങളെ പ്രോത്സാഹിപ്പിക്കുകയും ചെയ്യുമെന്ന് ചടങ്ങിൽ പങ്കെടുത്ത കേന്ദ്രമന്ത്രി പീയൂഷ് ഗോയൽ പറഞ്ഞു. പ്രധാന അടിസ്ഥാന സൗകര്യവികസന പദ്ധതികളിൽ നിക്ഷേപം നടത്താൻ ആഗ്രഹിക്കുന്നവർക്കായി സമഗ്ര കാഴ്ചപ്പാടിലൂടെ മുൻകാലങ്ങളിൽ നേരിട്ട പ്രശ്‌നങ്ങൾ മനസിലാക്കി പരിഹാരം കണ്ടെത്താനാണ് പിഎം ഗതിശക്തി കേന്ദ്രസർക്കാർ അവതരിപ്പിക്കുന്നത്.
ഡൽഹിയിലെ പ്രഗതി മൈതാനിയിൽ നടന്ന പ്രദർശനത്തിലാണ് പ്രധാനമന്ത്രി പദ്ധതി രാജ്യത്തിന് സമർപ്പിച്ചത്. പതിറ്റാണ്ടുകളായി പിന്നിലായിരുന്ന രാജ്യത്തെ അടിസ്ഥാനസൗകര്യ വികസന സ്വപ്‌നങ്ങൾക്ക് പുതിയ ചിറക് നൽകുന്നതാണ് കേന്ദ്രസർക്കാരിന്റെ ആശയം. പദ്ധതികൾ പ്രത്യേകം പ്രത്യേകം ആസൂത്രണവും രൂപകൽപ്പനയും ചെയ്യുന്നതിന് പകരം പൊതുവായ കാഴ്ചപ്പാടോടെ രൂപകൽപ്പന ചെയ്ത് നടപ്പിലാക്കും.
വിവിധ മന്ത്രാലയങ്ങളുടെ പദ്ധതികൾ, ഭാരത് മാല, സാഗർമാല, ജലഗതാഗത പാതകൾ, ഡ്രൈ/ലാൻഡ് പോർട്ടുകൾ, ഉഡാൻ പോലുള്ള അടിസ്ഥാന സൗകര്യ വികസന പദ്ധതികൾ തുടങ്ങിയവും സംയോജിപ്പിച്ചാണ് പിഎം ഗതിശക്തി നടപ്പിലാക്കുക. ടെക്‌സ്റ്റൈൽ ക്ലസ്റ്ററുകൾ, ഫാർമസ്യൂട്ടിക്കൽ ക്ലസ്റ്ററുകൾ, പ്രതിരോധ ഇടനാഴികൾ, ഇലക്ട്രോണിക് പാർക്കുകൾ, വ്യാവസായിക ഇടനാഴികൾ, മത്സ്യബന്ധന ക്ലസ്റ്ററുകൾ, കാർഷിക മേഖലകൾ പോലുള്ള സാമ്പത്തിക മേഖലകൾ ഇതിന്റെ പരിധിയിൽ ഉൾപ്പെടുത്തും. രാജ്യത്തെ വാണിജ്യ മേഖലയെ കൂടുതൽ മത്സരാധിഷ്ഠിതമാക്കാനും ഇതിലൂടെ സർക്കാർ ലക്ഷ്യമിടുന്നു.
സമഗ്രത, മുൻഗണന നിശ്ചയിക്കൽ, മികച്ചത് പ്രായോഗികമാക്കുക, സമന്വയിപ്പിക്കൽ, അവലോകനം ചെയ്യൽ, ചലനാത്മകം തുടങ്ങിയ ആറ് തൂണുകളെ അടിസ്ഥാനമാക്കിയാണ് പിഎം ഗതിശക്തി മാസ്റ്റർ പ്ലാൻ വിഭാവനം ചെയ്തിരിക്കുന്നത്.
