മുംബൈ: ഇന്ത്യയിൽ ക്യൂ 5 ഫെയ്സ് ലിഫ്റ്റിന്റെ ബുക്കിംഗ് ആരംഭിച്ച് ജർമൻ ആഡംബര വാഹന നിർമ്മാതാക്കളായ ഓഡി. രണ്ട് ലക്ഷം രൂപയാണ് വാഹനത്തിന്റെ ബുക്കിംഗ് തുക. ഈ മാസം അവസാനത്തോടെ ക്യൂ 5 ഫെയ്സ് ലിഫ്റ്റ് ഇന്ത്യൻ വിപണിയിലെത്തുമെന്നാണ് നിർമ്മാതാക്കൾ അറിയിച്ചിരിക്കുന്നത്.
‘വിജയകരമായ ക്യൂ കുടുംബത്തിലെ പുതിയ അംഗത്തിലായുള്ള ബുക്കിംഗ് ആരംഭിച്ചിരിക്കുകയാണ്. ഏവരെയും ആകർഷിക്കുന്ന പുതിയ ഡിസൈനുമായാണ് വാഹനം പുറത്തിറക്കുന്നത്. യാത്രക്കാരുടെയും ഡ്രൈവറുടെയും സുഖത്തിനും സന്തോഷകരവുമായ യാത്രക്കുമാണ് ഓഡി മുൻഗണന നൽകുന്നത്. കമ്പനിയുടെ മറ്റ് വാഹങ്ങളെ പോലെ ഇതിലും ആ മുൻഗണന നൽകിയിട്ടുണ്ട്’ ഓഡി ഇന്ത്യയുടെ തലവൻ ബൽബീർ സിംഗ് ദില്ലൻ പറഞ്ഞു.
2021 ഓഡി ക്യു 5യിൽ പുതിയതും വലുതുമായ സിംഗിൾ ഫ്രെയിം ഗ്രില്ലുകൾ നൽകിയിട്ടുണ്ട്. ഡാർക്ക് ക്രോം ബോർഡറുകളുള്ള സ്പോർട്ടി ബ്ലാക്ക് ട്രീറ്റ്മെന്റും വാഹനത്തിന് ലഭിക്കുന്നു. പുതിയ എൽഇഡി ഡേടൈം റണ്ണിംഗ് ലാമ്പുകളും, പുതുക്കിയ ഫുൾ എൽഇഡി ഹെഡ്ലാമ്പുകളും എസ് യുവിക്ക് ലഭിക്കും. മാട്രിക്സ് എൽഇഡി ഹെഡ്ലാമ്പുകൾ ഓപ്ഷണൽ ഫീച്ചറായി നൽകും. 19-ഇഞ്ച് 5 ഡബിൾ സ്പോക്ക് സ്റ്റാർ സ്റ്റൈൽ അലോയ് വീലുകളും എസ് യുവിക്ക് ലഭിക്കുന്നു.
ക്യാബിന് ഒരു പുതിയ ലുക്കാണ് നിർമ്മാതാക്കൾ നൽകിയിരിക്കുന്നത്. എസ്യുവിക്ക് മൂന്നാം തലമുറ മോഡുലാർ ഇൻഫോടെയ്ൻമെന്റ് പ്ലാറ്റ്ഫോം(എംഐബി 3) ലഭിക്കും. ഈ സിസ്റ്റത്തിൽ 10.1 ഇഞ്ച് ഡിസ്പ്ലേ സജ്ജീകരിച്ചിരിക്കുന്നു. വയർലെസ് ഫോൺ ചാർജർ, ഓഡി പാർക്ക് അസിസ്റ്റ്, സെൻസർ നിയന്ത്രിത ബൂട്ട്ലിഡ് പ്രവർത്തനത്തോടുകൂടിയ കംഫർട്ട് കീ, ഓഡി വെർച്വൽ കോക്ക്പിറ്റ് പ്ലസ്, ബി& ഒ പ്രീമിയം 3ഡി സൗണ്ട് സിസ്റ്റം എന്നീ സവിശേഷതകളും വാഹനത്തിൽ ഉൾപ്പെടുന്നു
2.0 ലിറ്റർ ടിഎഫ്എസ്ഐ എഞ്ചിനോടെയാണ് ഇന്ത്യ-സ്പെക്ക് 2021 ഓഡി ക്യൂ 5 എത്തുന്നത്. ഏഴ് സ്പീഡ് എസ്-ട്രോണിക് ഓട്ടോമാറ്റിക് ഡ്യുവൽക്ലച്ച് ഗിയർബോക്സുമായാണ് മോട്ടോർ ഘടിപ്പിച്ചിരിക്കുന്നത്. കൂടാതെ ക്വാട്രോ ഓൾ-വീൽ ഡ്രൈവ് സിസ്റ്റം സ്റ്റാൻഡേർഡായി വാഹനത്തിന് ലഭിക്കും.
