ഇടുക്കി : മുല്ലപ്പെരിയാർ അണക്കെട്ട് തുറന്ന പശ്ചാത്തലത്തിൽ ആശങ്കപ്പെടേണ്ട സാഹചര്യമില്ലെന്ന് ജലവിഭവ വകുപ്പ് മന്ത്രി റോഷി അഗസ്റ്റിൻ. അണക്കെട്ടിന്റെ സ്പിൽവേ ഷട്ടറുകൾ തുറന്ന ശേഷം മാദ്ധ്യമങ്ങളോട് ആയിരുന്നു അദ്ദേഹത്തിന്റെ പ്രതികരണം. ജാഗ്രതയോടെയാണ് അധികൃതരുടെ ഓരോ നീക്കങ്ങളുമെന്നും അദ്ദേഹം പറഞ്ഞു.
ജലം ഒഴുകി പോകുന്ന വഴികളിലെ തടസങ്ങൾ നേരത്തെ തന്നെ നീക്കിയിരുന്നു. 2018 ന് സമാനമായ സാഹചര്യങ്ങൾ ഇപ്പോൾ ഇല്ല.കഴിഞ്ഞ തവണയുണ്ടായ സാഹചര്യം ഒഴിവാക്കാൻ എല്ലാ മുൻകരുതലുകളും സ്വീകരിച്ചിരുന്നു. ജലം ഒഴുകിപ്പോകുന്ന പ്രദേശങ്ങളിലെ 350 കുടുംബങ്ങളെ മാറ്റിപ്പാർപ്പിച്ചിട്ടുണ്ട്. ഇവർക്ക് എല്ലാ സൗകര്യങ്ങളും സർക്കാർ ഒരുക്കിയിട്ടുണ്ടെന്നും അദ്ദേഹം പറഞ്ഞു.
കാലാവസ്ഥ മോശമായാൽ മുല്ലപ്പെരിയാറിൽ നിന്നും കൂടുതൽ വെള്ളം ഒഴുക്കിവിടും. ഇടുക്കി അണക്കെട്ട് നേരത്തെ തുറന്നു വിട്ടത് കൂടുതൽ ഗുണം ആയി. കൂടുതൽ വെള്ളം ഇവിടെ സംഭരിക്കാൻ കഴിഞ്ഞുവെന്നും റോഷി അഗസ്റ്റിൻ വ്യക്തമാക്കി.
