പനാമ സിറ്റി; പനാമ നഗരത്തിലെ നിശാക്ലബ്ബിലുണ്ടായ വെടിവെയ്പിൽ അഞ്ച് പേർ കൊല്ലപ്പെട്ടു. ആറ് പേർക്ക് പരിക്കേറ്റിട്ടുണ്ട്. പ്രാദേശിക ഗുണ്ടാസംഘങ്ങൾ തമ്മിലാണ് സംഘർഷം ഉണ്ടായത്. പനാമ പോലീസാണ് ഇക്കാര്യം അറിയിച്ചത്.
പനാമയിലെ എസ്പാസിയോ നിശാക്ലബ്ബിലാണ് സംഭവം ഉണ്ടായത്. സംഭവവുമായി ബന്ധപ്പെട്ട് പോലീസ് രണ്ട് പേരെ അറസ്റ്റ് ചെയ്തിട്ടുണ്ട്. അക്രമികൾ വന്ന കാറും ആയുധങ്ങളും പിടിച്ചെടുത്തതായും പനാമ പോലീസ് കമ്മീഷണർ ട്വിറ്ററിൽ അറിയിച്ചു.
സാന്റ അന ജില്ലയിലാണ് എസ്പാസിയോ നിശാക്ലബ്ബ്. ഇവിടെ സംഗീതപരിപാടി നടന്നുകൊണ്ടിരിക്കെയായിരുന്നു അക്രമം. പുറത്തുനിന്നെത്തിയ അക്രമി ക്ലബ്ബിലുണ്ടായിരുന്ന ഗുണ്ടാസംഘത്തിലെ യുവാക്കൾക്ക് നേരെ വെടിയുതിർക്കുകയായിരുന്നു. സ്ത്രീകൾ അടക്കമുളളവർ ഹാളിൽ ഉണ്ടായിരുന്നപ്പോഴാണ് സംഭവം. വെടിയൊച്ച മുഴങ്ങിയതോടെ ആളുകൾ പരിഭ്രാന്തരായി പാഞ്ഞു.
പരിക്കേറ്റവരെ സമീപത്തെ സർക്കാർ ആശുപത്രിയിൽ പ്രവേശിപ്പിച്ചു. ഇവരുടെ പരിക്കുകൾ നിസാരമാണെന്നും പോലീസ് പറഞ്ഞു. അക്രമത്തിന് കാരണം എന്താണെന്ന് വ്യക്തമായിട്ടില്ല.
Comments