മുംബൈ: ലഹരിപാർട്ടിയുമായി ബന്ധപ്പെട്ട് അറസ്റ്റിലായ മകൻ ആര്യൻ ഖാൻ വീട്ടിൽ തിരിച്ചെത്തിയതിന്റെ സന്തോഷത്തിലാണ് ഷാരൂഖ് ഖാനും കുടുംബവും. ഈ സാചര്യത്തിൽ ഷാരൂഖ് ഖാൻ സിദ്ധിവിനായക് ക്ഷേത്രത്തിൽ ദർശനം നടത്തിയേക്കുമെന്ന റിപ്പോർട്ടുകളാണ് പുറത്തുവരുന്നത്. ഷാരൂഖ് ഖാനുമായി അടുത്ത വൃത്തങ്ങളാണ് ഇക്കാര്യം പുറത്തുവിട്ടത്.
ഷാരൂഖ് ഖാൻ എല്ലാ വർഷവും കുടുംബത്തോടൊപ്പം മന്നത്തിൽ വിനായക ചതുർഥി ആഘോഷിക്കാറുണ്ട്. വീട്ടിൽ ഗണപതി വിഗ്രഹം പോലും സൂക്ഷിച്ചിട്ടുണ്ടെന്ന് ഷാരൂഖുമായി അടുത്ത് ബന്ധമുള്ളവർ വെളിപ്പെടുത്തിയിട്ടുണ്ട്. മകൻ മോചിതനായ ശേഷം വളരെ സന്തോഷത്തിലാണ് ഷാരൂഖ് എന്നും ഗണപതി ഭഗവാന് നന്ദി പ്രകടിപ്പിക്കാനാണ് ക്ഷേത്ര ദർശനം നടത്തുന്നതെന്നുമാണ് വിവരം.
സോഷ്യൽ മീഡിയയിൽ അത്ര സജീവമല്ലാത്ത ഷാരൂഖ് ഖാൻ എല്ലാ വർഷവും വിനായക ചതുർഥി ദിനത്തിൽ ആശംസകൾ നേർന്ന് എത്താറുണ്ട്. തന്റെ വീട്ടിലെ ഗണപതി വിഗ്രഹത്തിന്റെ ഫോട്ടോയാണ് ഷാരൂഖ് പങ്കുവെയ്ക്കാറുള്ളത്. വ്യാഴാഴ്ച്ചയാണ് ആര്യൻ ഖാന് ബോംബൈ ഹൈക്കോടതി ജാമ്യം അനുവദിച്ചത്.
22 ദിവസത്തെ ജയിൽ വാസം അവസാനിപ്പിച്ച് രാവിലെ 11 മണിയോടെ ആര്യൻഖാൻ ജയിലിന് പുറത്തേക്ക് എത്തിയത്. ആര്യനെ സ്വീകരിക്കാൻ ഷാരൂഖ് ഖാനും എത്തിയിരുന്നു. കരഞ്ഞുകൊണ്ടാണ് ജാമ്യവാർത്ത ഷാരൂഖ് കേട്ടതെന്ന് ആര്യന് വേണ്ടി കോടതിയിൽ ഹാജരായ മുകുൾ റോഹ്ത്തഗി പറഞ്ഞിരുന്നു. ഒക്ടോബർ രണ്ടിനാണ് ആര്യൻ ഖാൻ ലഹരി ഇടപാട് കേസിൽ അറസ്റ്റിലാകുന്നത്.
