ദുബായ്: ടി20 ലോകകപ്പിൽ ഇന്ത്യയുടെ നിർണ്ണായക നാലാം മത്സരം നടക്കുമ്പോൾ കോഹ് ലി ആരാധകർ ഇരട്ടി മധുരം നുണയാനുള്ള തയ്യാറെടുപ്പിലാണ്. തങ്ങളുടെ വീരനായകനായ വിരാട് കോഹ് ലിയുടെ പിറന്നാളാണിന്ന്. ഇതിനിടെ ഇന്ത്യക്കെതിരെ കളിക്കാനിറങ്ങുന്ന സ്‌കോട്‌ലന്റ് നായകൻ വിരാട് കോഹ്‌ലിയെ ഡ്രസ്സിംഗ് റൂമിലേക്ക് ക്ഷണിച്ചിരിക്കുകയാണ്.
ലോകക്രിക്കറ്റിലെ അംബാസിഡറാണ് വിരാട് കോഹ് ലിയെന്നാണ് സ്‌കോട്‌ലന്റ് ക്യാപ്റ്റൻ കെയിൽ കോറ്റ്‌സർ വിശേഷിപ്പിച്ചത്. ലോകക്രിക്കറ്റിലെ മികച്ച താരമെന്ന നിലയിൽ സ്‌കോട്‌ലന്റ് താരങ്ങൾക്ക് വിരാടിൽ നിന്നും നിരവധി കാര്യങ്ങൾ മനസ്സിലാക്കാനുണ്ടെന്നാണ് കോസ്റ്റർ പറയുന്നത്.
33-ാം പിറന്നാളാണ് കോഹ്‌ലി ടി20 വേദിയിൽ ആഘോഷിക്കാൻ പോകുന്നത്. ലോകത്തിന്റെ വിവിധ ഭാഗങ്ങളിൽ നിന്ന് ആരാധകർ വിരാടിന് ദീപാവലി ആശംസകളും പിറന്നാൾ ആശംസകളും നേരുകയാണ്. ഇത് ജീവിതത്തിൽ രണ്ടാം തവണയാണ് ഒരു അന്താരാഷ്‌ട്ര മത്സരം നടക്കുന്ന ദിവസം വിരാട് തന്റെ പിറന്നാൾ ആഘോഷിക്കുന്നത്. 2005ൽ ദക്ഷിണാഫ്രിക്കയുടെ പര്യടനം നടക്കുന്നതിനിടെയാണ് ആദ്യമായി വിരാട് പിറന്നാൾ ആഘോഷിച്ചത്.
