തിരുവനന്തപുരം : പുതിയ ചിത്രം മരക്കാർ അറബിക്കടലിന്റെ സിംഹം തിയറ്ററുകളിൽ പ്രദർശിപ്പിക്കുന്നതിലുള്ള സന്തോഷം പങ്കുവെച്ച് നടൻ മോഹൻലാൽ. ആഹ്ളാദം അടക്കാൻ കഴിയുന്നില്ലെന്ന് അദ്ദേഹം പറഞ്ഞു. സിനിമ തിയറ്ററുകളിൽ റിലീസ് ചെയ്യുമെന്ന വാർത്തകൾക്ക് പിന്നാലെ ഫേസ്ബുക്കിലൂടെയായിരുന്നു അദ്ദേഹത്തിന്റെ പ്രതികരണം.
‘ വലിയ സർപ്രൈസിന്റെ സീൽ പൊട്ടിക്കാൻ സമയം ആയി. ഞങ്ങൾക്ക് സന്തോഷം അടക്കാനാകുന്നില്ല. നിങ്ങൾക്കായി ഒരുക്കിയ ദൃശ്യവിരുന്ന് നിങ്ങൾ എവിടെയാണോ കാണാൻ ആഗ്രഹിച്ചത് അവിടെ തന്നെ നിങ്ങൾക്ക് ആസ്വദിക്കാം. ലോകമെമ്പാടുമുള്ള തിയറ്ററുകളിൽ ഡിസംബർ രണ്ടിന് മരക്കാർ അറബിക്കടലിന്റെ സിംഹം പ്രദർശിപ്പിക്കും’- മോഹൻലാൽ ഫേസ്ബുക്കിൽ കുറിച്ചു.
ഏറെ വിവാദങ്ങൾക്ക് ശേഷമാണ് മരക്കാറിന്റെ റിലീസ് സംബന്ധിച്ച് അന്തിമ തീരുമാനം ആയത്. വ്യാഴാഴ്ച സാംസ്‌കാരിക വകുപ്പ് മന്ത്രി സജി ചെറിയാന്റെ നേതൃത്വത്തിൽ ചർച്ച നടന്നിരുന്നു. ഇതിലാണ് മരക്കാർ തിയറ്ററുകളിൽ റിലീസ് ചെയ്യാൻ തീരുമാനമായത്.
പുതിയ തീരുമാനം മോഹൻലാൽ ആരാധകർക്കും സിനിമാ പ്രേമികൾക്കും സന്തോഷം നൽകുന്നതാണ്.
