ന്യൂഡൽഹി: ഇന്ത്യയുടെ മുൻതാരം വി.വി.എസ് ലക്ഷ്മൺ നാഷ്ണൽ ക്രിക്കറ്റ് അക്കാദമിയുടെ ചുമതലയേൽക്കുമെന്ന് ബി.സി.സിഐ അദ്ധ്യക്ഷൻ സൗരവ് ഗാംഗുലി.രാഹുൽ ദ്രാവിഡിന്റെ പിൻഗാമിയായിട്ടാണ് വി.വി.എസ് ലക്ഷ്മൺ ചുമതലയേറ്റെടുക്കുന്നത്. കഴിഞ്ഞ ദിവസം ദ്രാവിഡ് ഇന്ത്യൻ ക്രിക്കറ്റ് ടീമിന്റെ പരിശീലകനായി ചുമതലയേറ്റെടുത്തിരുന്നു.
ഈ മാസാവസാനം നടക്കാനിരിക്കുന്ന ഇന്ത്യ എ ടീമിന്റെ ദക്ഷിണാഫ്രിക്കൻ പര്യടനത്തിന് ശേഷം ലക്ഷ്മൺ എൻ സി എ തലവനായി സ്ഥാനമേറ്റെടുക്കുമെന്നാണ് സൂചന എൻ സി എ തലവനാകുന്നതോടെ ലക്ഷ്മണിനായിരിക്കും പിന്നീട് ഇന്ത്യ എ,അണ്ടർ 19 ടീമുകളുടേയും ചുമതല.
നേരത്തെയും ലക്ഷ്മണനെ എൻ സി എ യുടെ ഡയറക്ടറായി നിയമിക്കാൻ ബിസിസിഐ നീക്കങ്ങൾ നടത്തിയിരുന്നുവെങ്കിലും അദ്ദേഹം കാര്യമായ താല്പര്യം കാണിച്ചിരുന്നില്ല.കുടുംബ പശ്ചാത്തലം പറഞ്ഞ് ലക്ഷമൺ ആദ്യം സ്ഥാനമേറ്റെടുക്കാൻ തയ്യാറായിരുന്നില്ല.എന്നാൽ സ്ഥാനം ഏറ്റെടുക്കാൻ ദ്രാവിഡ് നേരിട്ട് ലക്ഷമണനെ കാര്യങ്ങൾ ബോധ്യപ്പെടുത്തുകയായിരുന്നുവെന്നാണ് റിപ്പോർട്ട്. ഇന്ത്യൻ ക്രിക്കറ്റിന്റെ വളർച്ചയ്‌ക്ക് മുൻ താരങ്ങളുടെ സേവനം അത്യാവശ്യമാണെന്ന് ഗാംഗുലി വ്യക്തമാക്കിയിരുന്നു.നിലവിൽ ഐപിഎൽ ഫ്രാഞ്ചൈസി സൺറൈസേഴ്‌സ് ഹൈദരാബാദിന്റെ ഉപദേശകനും ക്രിക്കറ്റ് കമന്റേറ്ററുമാണ് വിവിഎസ് ലക്ഷ്മൺ.
