ജോഹന്നാസ്ബർഗ്ഗ്: ലോകക്രിക്കറ്റിലെ മികച്ച ബാറ്റ്‌സ്മാനായ എ.ബി. ഡിവിലിയേഴ്‌സ് ക്രിക്കറ്റ് മതിയാക്കുന്നു. ക്രിക്കറ്റിലെ എല്ലാ വിഭാഗം മത്സരങ്ങളിൽ നിന്നും താൻ വിരമിക്കുക യാണെന്ന് എ.ബി പറഞ്ഞു. 2018ൽ ദക്ഷിണാഫ്രിക്കയുടെ ദേശീയ ടീമിൽ നിന്നും ഡിവിലിയേഴ്‌സ് പിന്മാറിയിരുന്നു. ജോഹന്നാസ്ബർഗ്ഗിൽ ഓസ്‌ട്രേലിയക്കെതിരെയാണ് അവസാന ടെസ്റ്റ് മത്സരം കളിച്ചത്. ഏകദിനത്തിൽ അവസാന മത്സരം 2018 ഫെബ്രുവരിയിൽ ഇന്ത്യക്കെതിരെയായിരുന്നു.
‘ക്രിക്കറ്റിലെ യാത്ര അതിമനോഹരമായിരുന്നു. എന്നാൽ ക്രിക്കറ്റിലെ എല്ലാ രംഗത്തുനിന്നും പിന്മാറാനാണ് നിലവിലെ തീരുമാനം. തന്റെ മുറ്റത്ത് കൂട്ടുകാരുമൊത്തുള്ള കളികൾ മുതൽ ഇന്നേവരെ ക്രിക്കറ്റ് കളിച്ചത് ഏറെ ആവേശത്തോടെയായിരുന്നു. എന്നാലിന്ന് വയസ്സ് 37 ആയിരിക്കുന്നു. ഇനി പുതിയ സീസണുകളിൽ മുൻപത്തെപോലെ തിളങ്ങാനാകില്ല.’ ഡിവിലിയേഴ്‌സ് ട്വീറ്റ് ചെയ്തു.
ഇന്ത്യൻ പ്രീമിയർ ലീഗിലെ ഏറ്റവും മികച്ച റെക്കോഡുള്ള ബാറ്റ്‌സ്മാൻ റോയൽ ചലഞ്ചേഴ്‌സ് ബാംഗ്ലൂരിനായി 184 മത്സരങ്ങളാണ് ഇതുവരെ കളിച്ചത്. അന്താരാഷ്‌ട്ര ക്രിക്കറ്റിൽ 114 ടെസ്റ്റുകളും, 228 ഏകദിനങ്ങളും 78 ടി20യിലുമാണ് ദക്ഷിണാഫ്രിക്കൻ ദേശീയ ടീമിനായി ഡിവിലിയേഴ്‌സ് കളിച്ചത്.
