മുംബൈ: ഔഡിയുടെ പ്രീമിയം എസ് യുവിയായ ക്യൂ5ന്റെ പുതിയ വകഭേദം വിപണിയിൽ എത്തിച്ചു. രണ്ട് മോഡലുകളിലായാണ് വാഹനം എത്തിയത്. 58.93 ലക്ഷം മുതൽ 63.77 ലക്ഷം രൂപയാണ് കാറിന്റെ എസ്ക് ഷോറൂം വില. ബിഎസ്6 നിലവാരത്തിലേയ്ക്ക് ഇന്ത്യൻ വാഹന വിപണി ഉയർന്നതിനെ തുടർന്ന് പഴയ ക്യൂ5 പിൻവലിച്ചിരുന്നു. ഇതിനു ഒരു വർഷത്തിന് ശേഷമാണ് മാറ്റങ്ങൾ വരുത്തി വാഹനം വിപണിയിൽ സജീവമാവാൻ ഒരുങ്ങുന്നത്.
പ്രീമിയം പ്ലസ്, ടെക്നോളജി എന്നീ വകഭേദങ്ങളിലാണ് വാഹനം വിപണിയിലെത്തിയത്. പിൻവലിച്ച പഴയ മോഡലിൽ നിന്നും കാര്യമായ മാറ്റങ്ങളോടെയാണ് പുത്തൻ ക്യൂ5 അരങ്ങേറിയത്. വലുപ്പവും, വീതി കൂടിയതുമായ ഹെക്സഗണൽ ഗ്രിൽ, വെർട്ടിക്കൽ ക്രോം സ്ട്രിപ്, 19 ഇഞ്ച് എസ് ഡിസൈൻ അലോയ് വീലുകൾ, റീസ്റ്റൈൽഡ് എൽഇഡി ടെയിൽ ലാംപ്, റീഡിസൈൻ ചെയ്ത ബംബർ എന്നിവ വാഹനത്തിന് മാറ്റുകൂട്ടുന്നു.
വാഹനത്തിന്റെ അകത്തളത്തിലെ മാറ്റങ്ങളും വളരെ ആകർഷണീയമാണ്. 10.1 ഇഞ്ച് ടച്ച് സ്ക്രീൻ ഇൻഫോടെയ്ൻമെന്റ് സിസ്റ്റമാണ് ക്യൂ5ൽ നൽകിയിരിക്കുന്നത്. ഔഡിയുടെ എംഐബി3 പ്ലാറ്റ്ഫോമിലാണ് ഇൻഫോടെയ്ൻമെന്റ് സിസ്റ്റം സജ്ജീകരിച്ചിരിക്കുന്നത്. ഇതിനു പുറമെ, വെർച്വൽ കോക്പിറ്റ് പ്ലസ്, ബി ആൻഡ് ഒ 3ഡി പ്രീമിയം സൗണ്ട് സിസ്റ്റം, ഓട്ടോമാറ്റിക്ക് ക്ലൈമറ്റ് കൺട്രോൾ എന്നിവയും ക്യൂ5ന്റെ പ്രത്യേകതകളിൽ ചിലതാണ്.
2.0 ലിറ്റർ, നാല് സിലിണ്ടർ ടർബോ പെട്രോൾ എഞ്ചിനാണ് വാഹനത്തിന്റെ ഹൃദയം. ഇത് 249 എച്പി കരുത്തും, 370 എൻഎം ടോർക്കും ഉത്പാദിപ്പിക്കുന്നു. ഈ എഞ്ചിൻ 7-സ്പീഡ് ഡ്യുവൽ ക്ലച്ച് ഗിയർബോക്സുമായാണ് ഘടിപ്പിച്ചിരിക്കുന്നത്. വാഹനം ഓൺലൈൻ വഴി ബുക്ക് ചെയ്യാനുള്ള സൗകര്യവും നിർമ്മാതാക്കൾ ഒരുക്കിയിട്ടുണ്ട്. 2 ലക്ഷം രൂപയാണ് വാഹനം ബുക്ക് ചെയ്യാനുള്ള തുക.
Comments