തിരുവനന്തപുരം: ഹലാൽ ഭക്ഷണത്തെ പിന്തുണച്ച മുഖ്യമന്ത്രി പിണറായി വിജയനെതിരെ രൂക്ഷ വിമർശനവുമായി ബിജെപി സംസ്ഥാന അദ്ധ്യക്ഷൻ കെ. സുരേന്ദ്രൻ. അടുത്തിടെയായി സ്വന്തം വീട്ടിൽ മുഖ്യമന്ത്രിയ്ക്ക് ഹലാൽ ഭക്ഷണമാണ് ലഭിക്കുന്നത്. അതിനാലാണ് പിണറായി വിജയൻ ഹലാലിനെ ന്യായീകരിച്ചതെന്ന് കെ. സുരേന്ദ്രൻ പറഞ്ഞു.
ഹലാൽ ഭക്ഷണം നല്ലതാണെന്ന് പറയുന്ന മുഖ്യമന്ത്രി ഇവിടെ തീവ്രവാദികൾക്ക് പിന്തുണ നൽകുകയാണെന്നും അദ്ദേഹം പറഞ്ഞു. ഹലാൽ നല്ല ഭക്ഷണമാണെങ്കിൽ ബാക്കി എല്ലാം മോശം ഭക്ഷണമാണോ എന്ന് മുഖ്യമന്ത്രി വ്യക്തമാക്കണം. ഇരവാദത്തെ പ്രോത്സാഹിപ്പിക്കുകയാണ് മുഖ്യമന്ത്രി. ഇത് ആപൽക്കരമായ നീക്കമാണെന്നും സുരേന്ദ്രൻ പറഞ്ഞു.
ഹലാൽ എന്നാൽ കഴിക്കാൻ പറ്റുന്നത് എന്നാണ് മുഖ്യമന്ത്രി പറഞ്ഞത്. വിവാദം ഉയർത്തി ചേരിതിരിവുണ്ടാക്കാനാണ് സംഘപരിവാർ ശ്രമിക്കുന്നതെന്നും മുഖ്യമന്ത്രി ആരോപിച്ചിരുന്നു. മുഖ്യമന്ത്രിയുടെ പ്രതികരണം കൂടി പുറത്തുവന്നതോടെ ഹലാൽ വിഷയത്തിൽ സിപിഎമ്മിലെ അഭിപ്രായ ഭിന്നതയാണ് പുറത്തുവന്നത്. ഹോട്ടലുകളിലെ ഹലാൽ ബോർഡുകൾക്കെതിരെ തലശേരി എംഎൽഎ അഡ്വ. എ.എൻ ഷംസീർ അടക്കമുള്ളവർ എത്തിയിരുന്നു.
