കൊച്ചി: മോഹൻലാൽ ചിത്രം മരക്കാർ ഒരിക്കലും പ്രദർശിപ്പിക്കില്ലെന്ന് വെല്ലുവിളിച്ച ഷേണോയീസ് തീയേറ്ററിൽ മരക്കാറിന്റെ മാരത്തോൺ ഷോകൾ. മരക്കാറിന്റെ 17 ഷോകളാണ് ഇവിടെയുള്ളത്. നേരത്തെ ഷേണോയീസ് തീയേറ്റർ ഉടമ സുരേഷ് ഷേണായി ചിത്രം പ്രദർശിപ്പിക്കില്ലെന്ന് വെല്ലുവിളിച്ചിരുന്നു. ഒടിടി റിലീസുമായി ബന്ധപ്പെട്ട വിവാദങ്ങൾക്കിടെയാണ് ചിത്രം തീയേറ്ററിൽ പ്രദർശിപ്പിക്കില്ലെന്ന് അദ്ദേഹം പറഞ്ഞത്.
ഡിസംബർ രണ്ടിന് ആദ്യം അഞ്ച് ഷോകളാണ് ഷേണോയീസ് തീയേറ്ററിൽ പ്രഖ്യാപിച്ചത്. മിനിറ്റുകൾക്കുള്ളിൽ ടിക്കറ്റുകൾ വിറ്റഴിഞ്ഞതോടെ 17 ഷോകൾ കൂടി അതേ ദിവസം തന്നെ പ്രഖ്യാപിക്കുകയായിരുന്നു. എല്ലാ ഷോകളിലും ആളുകൾ നിറഞ്ഞിട്ടുണ്ട്. ആശിർവാദിന്റെ 40ഓളം തീയേറ്ററുകളിലും ദിലീപിന്റെ ഉടമസ്ഥതയിലുള്ള തീയേറ്ററുകളിലുമാണ് ആദ്യം റിലീസ് പ്രഖ്യാപിച്ചത്.
അതേസമയം മോഹൻലാൽ നായകനായ മരക്കാർ അറബിക്കടലിന്റെ സിംഹം ഡിസംബർ രണ്ടിന് റിലീസ് ചെയ്യും. 3300സ്ക്രീനുകളിലാണ് മരക്കാർ റിലീസ് ചെയ്യുന്നത്. കേരളത്തിൽ മാത്രം 600 സ്ക്രീനുകളിൽ പ്രദർശനത്തിനെത്തും. പുലർച്ചെ 12.01നാണ് കേരളത്തിൽ ചിത്രത്തിന്റെ ആദ്യ ഷോ തുടങ്ങുന്നത്. മലയാളത്തിന് പുറമെ, ഹിന്ദി, തെലുങ്ക്, കന്നഡ ഭാഷകളിലും ചിത്രം റിലീസ് ചെയ്യുന്നുണ്ട്.
Comments