ന്യൂഡൽഹി:കൊറോണയുടെ പുതിയ വകഭേദം ഒമിക്രോണിനെതിരെ ഇന്ത്യ തദ്ദേശീയമായി നിർമ്മിച്ച കൊവാക്‌സിൻ ഫലപ്രദമാവുമോ എന്ന സംശങ്ങളോട് പ്രതികരിച്ച് ഭാരത് ബയോടെക്.
വുഹാനിൽ സ്ഥിരീകരിച്ച കൊറോണ വൈറസിനെതിരെയാണ് ഭാരത് ബയോടെക് വാക്‌സിൻ വികസിപ്പിച്ചെടുത്തത്.എന്നാൽ ഗവേഷണ ഫലങ്ങൾ പരിശോധിക്കുമ്പോൾ ഡെൽറ്റ വേരിയെന്റ് ഉൾപ്പെടെയുള്ള കൊറോണയുടെ മറ്റ് വകഭേദങ്ങൾക്കെതിരെ വാക്‌സിൻ ഫലപ്രദമാണെന്ന് തെളിഞ്ഞിട്ടുണ്ട്. ഈ സാഹചര്യത്തിൽ വാക്‌സിൻ ഒമിക്രേണിനെതിരെ ഫലപ്രദമാവുമോ എന്ന് പരിശോധിക്കുന്നതിനായി ഗവേഷണങ്ങൾ ആരംഭിച്ചതായി ഭാരത് ബയോടെക് വ്യക്തമാക്കി.
ഇന്ത്യ തദ്ദേശീയമായി വികസിപ്പിച്ച കൊവാക്‌സിൻ അതിതീവ്ര വ്യാപനശേഷിയുള്ള ആൽഫ,ഡെൽറ്റ വകഭേദങ്ങൾക്കെതിരെ ഫലപ്രദമാണെന്ന് യുഎസ് നാഷ്ണൽ ഇൻസ്റ്റിറ്റ്യൂട്ട് ഓഫ് ഹെൽത്ത് അടക്കം സ്ഥിരീകരിച്ചിരുന്നു.അതിതീവ്രശേഷിയുള്ള വകഭേദങ്ങളെ ചെറുക്കാൻ ശേഷിയുള്ള ശക്തമായ ആന്റിബോഡികൾ കൊവാക്‌സിൻ ഉത്പാദിപ്പിക്കുന്നുണ്ടെന്നാണ് പഠനങ്ങളിൽ തെളിഞ്ഞത്. ഒമിക്രോൺ ലോകമൊട്ടാകെ ഭീതി പടർത്തിയ സാഹചര്യത്തിൽ കൊവാക്‌സിൻ പുതിയ വകഭേദത്തിനെതിരെ ഫലപ്രദമാണെന്ന് തെളിയുന്നത് വലിയ ആശ്വാസമാണ് ഉണ്ടാക്കുക.
