തിരുവനന്തപുരം: മുസ്ലീം ലീഗിനെ നയിക്കുന്നത് ജമാഅത്തെ ഇസ്ലാമിയുടെ ആശയങ്ങളാണെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. മുസ്ലീം ലീഗിനെ നയിക്കുന്നത് ജമാഅത്തെ ഇസ്ലാമിയുടെ ആശയങ്ങളാണ്. പള്ളികളിൽ പ്രതിഷേധിക്കാൻ ആഹ്വാനം ചെയ്തത് ജമാഅത്തെ ഇസ്ലാമിയുടെ ആശയങ്ങൾ പേറുന്നത് കൊണ്ടാണ്. കേരളത്തിൽ മതനിരപേക്ഷതയുടെ അടിത്തറ തകർക്കാനാണ് വലതുപക്ഷ ശക്തികൾ ശ്രമിക്കുന്നതെന്നും കോടിയേരി പറഞ്ഞു. പാളയം ഏരിയ സമ്മേളനത്തിൽ സംസാരിക്കുകയായിരുന്നു കോടിയേരി.
അധികാര ദല്ലാൾമാരായി പാർട്ടി പ്രവർത്തകർ മാറരുതെന്നും കോടിയേരി ആവശ്യപ്പെട്ടു. ആരും അധികാര കേന്ദ്രങ്ങളാകരുത്. എല്ലാം പാർട്ടിയുമായി ആലോചിക്കണം. ഗുണ്ടാസംഘങ്ങളെ സംരക്ഷിക്കരുതെന്നും, അങ്ങനെ വന്നാൽ ജനങ്ങൾ പാർട്ടിയെ ഒറ്റപ്പെടുത്തുമെന്നും കോടിയേരി പറഞ്ഞു.
മതന്യൂനപക്ഷങ്ങളെ ആർഎസ്എസ് വെല്ലുവിളിക്കുകയാണ്. ഹലാൽ എന്ന വാക്കിനെ തെറ്റായി ചിത്രീകരിച്ച് മതചിഹ്നം ആക്കാൻ ശ്രമം നടക്കുന്നുണ്ട്. ചില മുസ്ലീം സംഘടനകൾ ഇതിനു ബദലായി പ്രവർത്തിക്കുന്നുണ്ടെന്നും കോടിയേരി പറഞ്ഞു.
Comments