വാഷിംഗ്ടൺ: അടുത്ത ആഴ്ച്ച ഭൂമിയ്ക്ക് അരികിൽ എത്തുന്നത് 35,000 കോടി രൂപ വിലയുള്ള ഛിന്നഗ്രഹമെന്ന് നാസ. 4600 നീരിയസ് എന്നാണ് ഈ ഛിന്നഗ്രഹത്തെ അറിയപ്പെടുന്നത്. 35,000 കോടി വിലപിടിപ്പുള്ള ഇരുമ്പ്, കോബാൾട്ട്, നിക്കൽ ലോഹനിക്ഷേപവും മറ്റ് ധാതു നിക്ഷേപങ്ങളും ഈ ഛിന്ന ഗ്രഹത്തിലുണ്ടെന്ന് നാസ അറിയിച്ചു.
ഡിസംബർ 11നാകും നീരിയസ് ഭൂമിയുടെ അടുത്ത് എത്തുക. മണിക്കൂറിൽ 23,700 കിലോമീറ്ററാകും അപ്പോൾ അതിന്റെ വേഗം. ഭൂമിയും ചന്ദ്രനും തമ്മിലുള്ള ദൂരത്തിന്റെ 10 മടങ്ങുണ്ടാകും നീരിയസും ഭൂമിയും തമ്മിലുള്ള ദൂരമെന്നാണ് നാസ വെളിപ്പെടുത്തുന്നത്. ഛിന്നഗ്രഹം നാസയുടെ സൂക്ഷ്മ നിരീക്ഷണത്തിലാണ്.
ഗൈയ എന്ന ഗ്രീക്ക് ദേവതയുടെ പുത്രനായ ദേവൻ നീരിയസിന്റെ പേരാണ് ഛിന്നഗ്രഹത്തിന് നൽകിയിരിക്കുന്നത്. 1982ലാണ് നീരിയസിനെ കണ്ടെത്തിയത്. രണ്ട് വർഷത്തോളം സമയമെടുത്ത് സൂര്യനെ വലംവെയ്ക്കുന്ന ഈ ഛിന്നഗ്രഹം പത്ത് വർഷം കൂടുമ്പോൾ ഭൂമിയ്ക്കരികിൽ എത്തും. നീരിയസ് അടുത്ത തവണ ഭൂമിയ്ക്ക് അരികിൽ എത്തുന്നത് 2031ലായിരിക്കും.
ഭൂമിക്ക് യാതൊരുവിധ ഭീഷണിയും ഈ ഛിന്നഗ്രഹം സൃഷ്ടിക്കില്ലെന്നാണ് ശാസ്ത്രജ്ഞർ വ്യക്തമാക്കുന്നത്. എന്നിരുന്നാലും അപകടകരമായി ഛിന്നഗ്രഹങ്ങളുടെ പട്ടികയിലാണ് ഇതിനെ ഉൾപ്പെടുത്തിയിട്ടുള്ളത്.
