ന്യൂഡൽഹി: തമിഴകത്തിന്റെ തലൈവർ രജനികാന്തിന് 71ാം പിറന്നാൾ ദിനത്തിൽ ആശംസകളുമായി പ്രധാനമന്ത്രി നരേന്ദ്രമോദി. തന്റെ സർഗ്ഗാത്മകത കൊണ്ടും അസാമാന്യമായ അഭിനയം കൊണ്ടും അദ്ദേഹം ആളുകളെ പ്രചോദിപ്പിച്ചുകൊണ്ടിരിക്കട്ടെ. സർവ്വശക്തൻ അദ്ദേഹത്തിന് ദീർഘായുസ്സും ആരോഗ്യവും നൽകി അനുഗ്രഹിക്കട്ടെ. പ്രധാനമന്ത്രി ട്വിറ്ററിൽ കുറിച്ചു.
‘ദാദാസാഹിബ് ഫാൽക്കെ’, ‘പത്മവിഭൂഷൺ’ പുരസ്‌കാരങ്ങൾ ലഭിച്ച മഹാനായ ഇന്ത്യൻ നടന് ജന്മദിനാശംസകൾ’ എന്ന് കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി കുറിച്ചു. ഇന്ത്യയിലെ ഏറ്റവും മികച്ച നടന്മാരിൽ ഒരാൾക്ക് എന്റെ ജന്മദിനാശംസകൾ’, കേന്ദ്ര സഹമന്ത്രി ഡോ ജിതേന്ദ്ര സിംഗ് എഴുതി. ക്രിക്കറ്റ് ഇതിഹാസം സച്ചിൻ ടെണ്ടുൽക്കർ ഉൾപ്പെടെ നിരവധി പ്രമുഖർ സ്റ്റൈൽ മന്നന് ആശംസകളുമായി എത്തിയിട്ടുണ്ട്.
സൂപ്പർസ്റ്റാറായ രജനികാന്ത് തമിഴ് ചലച്ചിത്രങ്ങൾക്ക് പുറമെ ഹിന്ദി, തെലുങ്ക്, കന്നഡ സിനിമാ വ്യവസായങ്ങളിലും പ്രവർത്തിച്ചിട്ടുണ്ട്. കെ ബാലചന്ദറിന്റെ ‘അപൂർവ രാഗങ്ങൾ’ എന്ന ചിത്രത്തിലൂടെയാണ് നടൻ തന്റെ അരങ്ങേറ്റം നടത്തിയത്, അത് ബോക്സ് ഓഫീസിൽ മികച്ച പ്രകടനം കാഴ്ചവെക്കുകയും അദ്ദേഹത്തിന് വലിയ ബ്രേക്ക് നൽകുകയും ചെയ്തു.
