സിംഗപ്പൂർ: ട്രെയിനിൽ യാത്ര ചെയ്യാൻ ഇഷ്ടപ്പെടാത്തവർ ചുരുക്കമായിരിക്കും. വിവിധ പ്രദേശങ്ങളിലേയ്ക്കും, ജില്ലകളിലേയ്ക്കും, രാജ്യങ്ങളിലേയ്ക്കും ഇന്ന് ട്രെയിൻ സർവ്വീസ് ലഭ്യമാണ്. എന്നാൽ ട്രെയിനിൽ 21 ദിവസം യാത്ര ചെയ്ത് 11,654 മൈൽ താണ്ടുന്ന ഒരു യാത്രയെ കുറിച്ച് നിങ്ങൾ കേട്ടിട്ടുണ്ടോ? സംശയിക്കേണ്ട അത്തരത്തിലൊരു യാത്രയുണ്ട്. ലോകത്തിലെ ഏറ്റവും ദൈർഘ്യമേറിയ ട്രെയിൻ യാത്ര…
പോർച്ചുഗലിലെ ലാഗോസിൽ നിന്നും സിംഗപ്പൂരിലേയ്ക്കുള്ളതാണ് ലോകത്തിലെ ഏറ്റവും ദൈർഘ്യമേറിയ ട്രെയിൻ യാത്ര. യാത്രാമദ്ധ്യേ വളരെ കുറച്ച് സ്റ്റേഷനുകൾ മാത്രമാണ് ട്രെയിനിനുള്ളത്. ഏകദേശം 21 ദിവസമെടുത്ത് 11,654 മൈൽ ദൂരമാണ് ട്രെയിൻ സഞ്ചരിക്കുന്നത്. ഈ യാത്രയിൽ പാരിസ്, മോസ്കോ, ബെയ്ജിംഗ്, ബാങ്കോക്ക്, യൂറോപ്പ്-ഏഷ്യ എന്നിവയുടെ വിവിധ ഭാഗങ്ങളിൽ ട്രെയിനിനു സ്റ്റോപ്പുണ്ട്. ഡിസംബർ രണ്ടിന് തന്നെ യാത്രയ്ക്കുളള ഒരുക്കങ്ങൾ പൂർത്തിയാക്കിയിരുന്നു.
ട്രെയിൻ യാത്രയുടെ പരീക്ഷണയോട്ടത്തിൽ വിയറ്റ്നാം വരെ വിജയകരമായി യാത്ര പൂർത്തിയാക്കിയിരുന്നു. ഏകദേശം 16,898 കിലോമീറ്റർ ദൂരമാണ് ട്രെയിൻ അന്ന് സഞ്ചരിച്ചത്. പിന്നീട് യാത്രക്കാർ അവിടുന്ന് ബസ് മാർഗമാണ് സിംഗപ്പൂരിൽ എത്തിയത്. ഇതിനെ തുടർന്ന് ഈ യാത്ര സാധ്യമാണോ എന്ന് പോലും ആളുകൾ ചിന്തിച്ചു. എന്നാൽ ഏതാനും നാളുകൾക്കുള്ളിൽ ട്രാക്കുകൾ കൂടുതൽ സജ്ജമാക്കി സിംഗപ്പൂർ വരെ സുഖയാത്രയ്ക്കുളള സംവിധാനം അധികൃതർ സജ്ജമാക്കുകയായിരുന്നു.
എന്നാൽ ഇത് പ്രായോഗികമാണോ എന്നാണ് പലരും ചിന്തിക്കുന്നത്. പക്ഷേ അക്ഷരാർത്ഥത്തിൽ ഇത് സാധ്യമാണെന്നാണ് ട്രെയിനിൽ യാത്ര ചെയ്ത ആളുകൾ പറയുന്നത്. ദീർഘദൂരം ട്രെയിനിൽ സഞ്ചരിക്കാൻ ഇഷ്ടപ്പെടുന്നവർക്ക് ഇത് പുതിയ ഒരു അനുഭവം തന്നെയാണ്. ബെയ്ജിംഗ്, ബാങ്കോക്ക് പിന്നെ അവിടുന്ന് സിംഗപ്പൂർ ഇങ്ങനെയാണ് യാത്രയുടെ പോക്ക്.
ദൈർഘ്യമേറിയ ഈ യാത്രയിൽ, ഏകദേശം 13 രാജ്യങ്ങളിലൂടെ യാത്രക്കാർക്ക് സഞ്ചരിക്കാൻ സാധിക്കും അതും 21 ദിവസം കൊണ്ട്. രാത്രികാലങ്ങളിൽ ചില സ്റ്റേഷനുകളിൽ ട്രെയിൻ യാത്ര നിർത്തും. യാത്രക്കാർക്ക് ആ സ്റ്റേഷൻ ഏത് രാജ്യത്താണോ, ആ രാജ്യത്തിന്റെ നിശാഭംഗി ആസ്വദിക്കാൻ സാധിക്കും. രാത്രികാലങ്ങളിൽ ട്രെയിൻ നിർത്തുമ്പോൾ, യാത്രക്കാർക്ക് അവരുടെ വിസ പരിശോധനയും മറ്റ് നൂലാമാലകളും പൂർത്തിയാക്കാൻ കഴിയും. 1,200 യൂറോയാണ് ടിക്കറ്റ് നിരക്ക്. അതായത് ഏകദേശം ഒരു ലക്ഷത്തിലധികം ഇന്ത്യൻ രൂപ.
പ്രകൃതിയെ സംരക്ഷിക്കുക എന്ന ലക്ഷ്യവും ഈ ദൈർഘ്യമേറിയ യാത്രയ്ക്ക് പിന്നിലുണ്ട്. പോർച്ചുഗലിൽ നിന്നും സിംഗപ്പൂരിലേയ്ക്ക് വിമാനം മാർഗം യാത്ര ചെയ്യുമ്പോൾ, ഏകദേശം 1.67 ടൺ കാർബൺ ഡയോക്സൈഡ് വാതകം പിന്തള്ളപ്പെടുന്നു. ഇത് പ്രകൃതിയ്ക്ക് ദോഷകരമാണ്. എന്നാൽ ഈ ഹൈ-സ്പീഡ് ട്രെയിനിൽ യാത്ര ചെയ്യുമ്പോൾ, ഏകദേശം 0.08 ടൺ കാർബൺ ഡയോക്സൈഡ് വാതകം മാത്രമേ പിന്തള്ളപ്പെടുന്നുള്ളൂ എന്നാണ് യാത്രയുടെ നടത്തിപ്പുകാർ അവകാശപ്പെടുന്നത്.
Comments