തിരുവനന്തപുരം: സിൽവർ ലൈൻ പദ്ധതി നടപ്പാക്കുന്നതിനെതിരെ കടുത്ത എതിർപ്പ് ഉയരുമ്പോഴും സർക്കാർ പദ്ധതിയുമായി മുന്നോട്ട് തന്നെ പോവുകയാണ്. ഈ സാഹചര്യത്തിൽ ലോക സഞ്ചാരിയായ സന്തോഷ് ജോർജ്ജ് കുളങ്ങരയുടെ അഭിപ്രായം എന്താണെന്ന് അറിയണണെന്ന് സമൂഹമാദ്ധ്യമങ്ങളിൽ ആവശ്യം ഉയർന്നിരുന്നു. ഇപ്പോഴിതാ ഇതിന് മറുപടിയുമായി എത്തിയിരിക്കുകയാണ് അദ്ദേഹം.
പദ്ധതി നടപ്പാക്കുമ്പോൾ വീടും സ്ഥലവും ജീവിതത്തിലെ ആകെയുള്ള സമ്പാദ്യവും നഷ്ടപ്പെടുന്ന സാധാരണ മനുഷ്യർക്കൊപ്പമാണ് താനെന്നാണ് സന്തോഷ് ജോർജ്ജ് കുളങ്ങര പറയുന്നത്. പാവപ്പെട്ടവരുടെ വേദന തനിക്ക് നന്നായിട്ട് അറിയാം. ലോകത്ത് എവിടേയും ഇത്തരത്തിൽ വലിയ പദ്ധതികൾ നടപ്പാക്കുമ്പോൾ ജനങ്ങളെ കുടിയിറക്കേണ്ടി വരും. അവരുടെ സ്ഥലം ഏറ്റെടുക്കേണ്ടി വരും. അവിടെയെല്ലാം അവർക്ക് നഷ്ടമാകുന്നതിനെല്ലാം പകരം കൊടുത്ത് സന്തോഷത്തോടെയാണ് അവരെ മാറ്റി പാർപ്പിക്കുന്നത്. വികസനത്തിന് തികഞ്ഞ മനസ്സോടെ സന്തോഷത്തോടെ അവർ അവരുടെ സമ്പാദ്യം വിട്ടു നൽകുകയാണ്.
അതിവേഗം കേരളത്തിന്റെ ഒരറ്റത്ത് നിന്ന് മറ്റൊരു അറ്റത്ത് എത്താനുള്ള സംവിധാനം നമുക്ക് വേണ്ടതാണ്. ഇന്ന് അത്ര ആവശ്യം അല്ലെന്ന് തോന്നുമെങ്കിലും ഭാവി തലമുറയ്ക്ക് ഇതാവശ്യമാണ്. ഹൈപ്പർലൂപ്പ് പോലെ ഇനി വരാനിരിക്കുന്ന ടെക്നോളജിയും നമ്മൾ ആശ്രയിക്കേണ്ടി വരും ഭാവിയിൽ. അതിവേഗം മറ്റ് ജില്ലകളിലെ ജോലി സ്ഥലത്തേക്ക് സ്വന്തം വീട്ടിൽ നിന്നും പോയിവരാൻ കഴിയുന്ന സംവിധാനം വരുന്ന തലമുറയ്ക്ക് ആവശ്യമാണ്.
എന്നാൽ ആർക്ക് വേണ്ടിയാണ് ഈ പദ്ധതികൾ. ഇവിടുത്തെ ജനങ്ങൾക്ക് വേണ്ടി. അതുകൊണ്ട് അവരുടെ ആശങ്കകൾ ആദ്യം പരിഹരിക്കണം. അവരെ കാര്യം പറഞ്ഞ് മനസിലാക്കണം. അവരുടെ കണ്ണീരിൽ കെട്ടിപ്പൊക്കരുത് വികസനം. അടുത്ത തലമുറയ്ക്ക് ഒരു ബാധ്യത ആകരുത്.’ അദ്ദേഹം പറയുന്നു.
Comments