ന്യൂയോർക്ക്: യുഎസ് പ്രസിഡന്റ് ജോ ബൈഡനോടൊപ്പം വളർത്തുനായക്കുട്ടി ബീച്ചിൽ കളിക്കുന്ന രംഗങ്ങളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. പുതിയ നായക്കുട്ടി കമാൻഡറുമൊത്ത് ബൈഡനും പത്നി ജിൽ ബൈഡനും സാധാരണക്കാരെ പോലെ ബീച്ചിൽ ഉല്ലസിക്കുന്നതാണ് ദൃശ്യങ്ങൾ.
WATCH: U.S. President Joe Biden and first lady Jill Biden took their new German Shepherd puppy, Commander, out for a stroll on the beach pic.twitter.com/dup6FMyNmM
— Reuters Asia (@ReutersAsia) December 29, 2021
ഡെലാവേറിലെ റെഹോബോത്ത് ബീച്ചിലുള്ള ബൈഡന്റെ വീടിനടുത്താണ് ഈ കാഴ്ച. നിലവിൽ ഡെലാവേറിൽ അവധിയാഘോഷിക്കുകയാണ് ബൈഡനും കുടുംബവും. കഴിഞ്ഞയാഴ്ച വൈറ്റ് ഹൗസിലെത്തിയ പുതിയ അതിഥിയാണ് കടൽ തീരത്ത് ബൈഡന്റെ കുടുംബത്തോടൊപ്പം കളിക്കുന്ന ജർമൻ ഷെപ്പേഡ്. പന്ത് എറിയുമ്പോൾ ഓടിച്ചെന്ന് എടുക്കുന്നതും ജിൽ ബൈഡന്റെ ദേഹത്ത് ചാടിക്കയറാൻ ശ്രമിക്കുന്നതും തുടങ്ങി കമാൻഡറുടെ കുസൃതികൾ ദൃശ്യങ്ങളിലുണ്ട്. പ്രസിഡന്റിന് പിറന്നാൾ സമ്മാനമായി ലഭിച്ചതായിരുന്നു ഈ നായക്കുട്ടിയെ.
സഹോദരൻ ജെയിംസ് ബൈഡനും ഭാര്യ സാറ ബൈഡനും ചേർന്ന് നൽകിയ സമ്മാനമായിരുന്നു ഇത്. നവംബറിൽ 79 തികഞ്ഞ ബൈഡന് കിട്ടിയ പിറന്നാൾ സമ്മാനത്തെക്കുറിച്ച് അദ്ദേഹം ട്വിറ്ററിലൂടെ പങ്കുവെച്ചിരുന്നു. വൈറ്റ് ഹൗസിലെത്തുന്ന മൂന്നാമത്തെ ജർമൻ ഷെപ്പേഡ് ആണിത്. മൂന്ന് വയസുകാരനായ മേജറിന്റെ അക്രമ സ്വഭാവം കൂടുതലായതുമൂലം കഴിഞ്ഞയിടയ്ക്ക് വൈറ്റ് ഹൗസിൽ നിന്ന് മാറ്റിയിരുന്നു. മറ്റൊരു ജർമൻ ഷെപ്പേഡ് ചാംപ് 13-ാം വയസിൽ ജീവൻ വെടിഞ്ഞു. ഇതിന് പിന്നാലെയാണ് കമാൻഡർ എത്തുന്നത്.
