മുംബൈ : പുതുവർഷം എങ്ങനെയായിരിക്കണമെന്ന ആഗ്രഹം പങ്കുവെച്ച് ബോളിവുഡ് താരം കങ്കണ റണാവത്ത്. ഇൻസ്റ്റഗ്രാമിലൂടെയാണ് താരം 2022 എങ്ങനെയാകണമെന്ന ആഗ്രഹം പങ്കുവെച്ചത്. പോലീസ് പരാതികൾ കുറവും, പ്രണയ ലേഖനങ്ങൾ കൂടുതലും ലഭിക്കുന്ന വർഷമാകണം 2022 എന്ന് താരം പറഞ്ഞു.
പുതുവർഷത്തോട് അനുബന്ധിച്ച് കങ്കണ തിരുപ്പതി ബാലാജി ക്ഷേത്രത്തിന് സമീപമുള്ള രാഹു കേതു ക്ഷേത്രത്തിൽ ദർശനം നടത്തിയിരുന്നു. ഇതിന്റെ ചിത്രത്തോടൊപ്പമാണ് കങ്കണ തന്റെ ആഗ്രഹം വ്യക്തമാക്കിയിരിക്കുന്നത്. വർഷം മികച്ചതാകാൻ ക്ഷേത്രത്തിൽ താരം പ്രത്യേക പൂജകളും നടത്തിയിരുന്നു.
ലോകത്തിലെ തന്നെ ഏക രാഹു കേതു ക്ഷേത്രമാണ് ഇതെന്ന് പൂജകളുടെ ക്ഷേത്രസന്ദർശനത്തിന്റെ ചിത്രങ്ങൾ പങ്കുവെച്ച് കങ്കണ പറഞ്ഞു. ക്ഷേത്രത്തിൽ പ്രത്യേക പൂജകളും വഴിപാടുകളും നടത്തി. പഞ്ചഭൂതങ്ങളിൽ വായു പ്രതിഷ്ഠയായുള്ള ക്ഷേത്രമാണ് ഇത്. തികച്ചും വ്യത്യസ്തമായൊരു സ്ഥലമാണ് ഇവിടമെന്നും കങ്കണ വ്യക്തമാക്കി.
പ്രിയപ്പെട്ട ശത്രുക്കൾ കരുണകാണിക്കുന്നതിന് വേണ്ടിയാണ് താൻ ഇവിടെ വന്നിരിക്കുന്നത്. ഈ വർഷം കുറവ് പോലീസ് പരാതികളും, കൂടുതൽ പ്രണയ ലേഖനങ്ങളുമാണ് വേണ്ടതെന്നും കങ്കണ ഇൻസ്റ്റഗ്രാമിൽ കുറിച്ചു.
2021 കങ്കണയ്‌ക്ക് നിയമ പോരാട്ടങ്ങളുടെ വർഷം ആയിരുന്നു. കഴിഞ്ഞ വർഷം നിരവധി പരാതികളാണ് കങ്കണയ്‌ക്കെതിരെ പോലീസിൽ ലഭിച്ചത്. ചാനൽ അഭിമുഖത്തിനിടെ തന്നെ അപകീർത്തിപ്പെടുത്തിയെന്ന് കാണിച്ച് ജാവേദ് അക്തർ നൽകിയ പരാതി ഇതിനൊരു ഉദാഹരണം ആണ്. 1947ൽ ലഭിച്ച സ്വാതന്ത്ര്യം ഭിക്ഷയാണെന്ന പരാമർശത്തിൽ കങ്കണയ്‌ക്കെതിരെ രാജ്യത്തെ വിവധ പോലീസ് സ്‌റ്റേഷനുകളിലാണ് പരാതി ലഭിച്ചത്.
