വിഷൻ-എസ് സെഡാൻ എന്ന ആശയം പുറത്തിറങ്ങി രണ്ട് വർഷം പിന്നിടുമ്പോൾ, കാർ നിർമ്മാണം കൂടുതൽ ഗൗരവമാക്കി ഏത് നിമിഷവും പുതിയ ഇവി വിൽപ്പന ആരംഭിക്കാം എന്ന സൂചന നൽകിയിരിക്കുകയാണ് സോണി. മറ്റ് ടെക്ക് ഭീമന്മാരുടെ പാത പിന്തുടർന്ന് ഇലക്ട്രിക് വാഹന രംഗത്തേക്ക് ഏത് നിമിഷവും പ്രവേശിക്കുമെന്ന് 2020ൽ തന്നെ സോണി ഗ്രൂപ്പ് അറിയിച്ചിരുന്നു. ഇതിനായി സോണി മൊബിലിറ്റി എന്ന പുതിയ കമ്പനിക്കും രൂപം നൽകിയിട്ടുണ്ട്. 2022 സിഇഎസിൽ പുത്തൻ എസ് യുവി ആശയമായ വിഷൻ-എസ് 02വിനെ കുറിച്ചുള്ള പ്രഖ്യാപനവും സോണി നടത്തിയിട്ടുണ്ട്.
വിഷൻ-എസ് 01 എന്ന ഇവി പ്രോട്ടോടൈപ്പ്, 2020 സിഇഎസ് വേദിയിലാണ് സോണി അവതരിപ്പിച്ചത്. സെഡാൻ വാഹനമായിരുന്നു അന്ന് പരീക്ഷണാടിസ്ഥാനത്തിൽ സോണി അവതരിപ്പിച്ചത്. ഇത്തവണ വിഷൻ-എസ് 02 എന്ന പേരിൽ ഒരു എസ് യുവിയാണ് സോണി അവതരിപ്പിച്ചത്. ടെസ്ല മോഡൽ Yക്ക് സമാനമായ വാഹനമായിരുന്നു പരീക്ഷണാടിസ്ഥാനത്തിൽ ഇറക്കിയ വിഷൻ-എസ് 01. ഏകദേശം 192.7 ഇഞ്ച് നീളവും, 76 ഇഞ്ച് വീതിയും, 65 ഇഞ്ച് ഉയരവുമായിരുന്നു വിഷൻ-എസ് 01 സെഡാൻ ഉണ്ടായിരുന്നത്. പുതുതായി അവതരിപ്പിച്ച വിഷൻ-എസ് 02 എസ് യുവിക്കും അതേ വലുപ്പമായിരിക്കും.
ഓട്ടോ-ഡ്രൈവിംഗിനായി 40 സെൻസറുകൾ, 360 ഡിഗ്രി ഓഡിയോ ഫീച്ചർ, 5ജി സപ്പോർട്ട് തുടങ്ങിയവ പുതിയ വാഹനത്തിൽ ഉണ്ടാകുമെന്ന് സോണി നേരത്തെ അറിയിച്ചിരുന്നു. വിഷൻ-എസ് 02 എസ് യുവിക്ക് ഒരു ജോഡി ഇലക്ട്രിക് മോട്ടറുകളാണ് നൽകിയിരിക്കുന്നത്. ഇവയിൽ ഓരോന്നും 200 കിലോവാട്ട് പവർ ഉത്പാദിപ്പിക്കും. 20-ഇഞ്ച് വീലുകളാണ് ഈ വാഹനത്തിന് നൽകിയിട്ടുള്ളത്. 536 എച്പി ഡ്യുവൽ മോട്ടോർ ഓൾ വീൽ ഡ്രൈവാണ് വാഹനത്തിന് നൽകിയിട്ടുള്ളത്. 240 കിലോമീറ്ററാണ് വാഹനത്തിന്റെ പരമാവധി വേഗത. 100 കിലോമീറ്റർ വേഗത കൈവരിക്കാൻ വെറും അഞ്ച് സെക്കൻഡുകൾ മാത്രമാണ് ആവശ്യം.
വിഷൻ-എസ് എസ് യുവിയിൽ ഏഴ് പേർക്ക് വരെ യാത്ര ചെയ്യാൻ സാധിക്കുന്ന സീറ്റിങ്ങ് സൗകര്യമാണ് ഒരുക്കിയിരിക്കുന്നത്. വിഷൻ-എസ് 01 സെഡാനിൽ നൽകിയിരുന്നത് പോലെ തന്നെയാണ് മറ്റ് സാങ്കേതിക സംവിധാനങ്ങൾ. ഇതിനെ കുറിച്ച് കാര്യമായ വ്യക്തതകൾ സോണി നൽകിയിട്ടില്ല. വാഹനങ്ങൾ ശരിയായി ഗതാഗതയോഗ്യമാണെന്ന് ഉറപ്പാക്കാൻ ഓസ്ട്രിയയിലെ മാഗ്ന-സ്റ്റെയറുമായി ചേർന്ന് സോണി പ്രവർത്തിക്കുന്നു.
Comments