ലക്‌നൗ: ജനാധിപത്യത്തിന്റെ ഉത്സവമാണ് തെരഞ്ഞെടുപ്പ്. ഉത്തർപ്രദേശ് അടക്കമുള്ള അഞ്ച് സംസ്ഥാനങ്ങളിൽ തെരഞ്ഞെടുപ്പ് തീയതി പ്രഖ്യാപിച്ചതോടെ നേതാക്കൾക്കിടയിൽ ആവേശവും കൂടി. മുൻപത്തെ തെരഞ്ഞെടുപ്പുകളിൽ നിന്നും വ്യത്യസ്തമായി ഇത്തവണ പ്രചാരണങ്ങളെല്ലാം തന്നെ ഡിജിറ്റലാണ്. എങ്കിൽ കൂടി തെരഞ്ഞെടുപ്പ് ആഘോഷങ്ങൾക്ക് ഒരു കുറവും വരുത്താതെ ആഘോഷമാക്കുകയാണ് ബിജെപി. പാർട്ടിയുടെ തെരഞ്ഞെടുപ്പ് പ്രചാരണ ഗാന നിർമ്മാണം അണിയറയിൽ പുരോഗമിക്കുകയാണ്. രാമക്ഷേത്രം ഉയരുകയായി എന്നു തുടങ്ങുന്ന ഗാനം അണിയറയിൽ ഒരുങ്ങുകയാണ്.
മുൻ ബിജെപി അദ്ധ്യക്ഷനും ഭോജ്പുരി കലാകാരനും ഗായകനും കൂടിയായ മനോജ് തിവാരിയാണ് ഗാനം ആലപിച്ചിരിക്കുന്നത്. ഗായകൻ കന്നയ്യ മിത്തലിനൊപ്പമാണ് മനോജ് തിവാരി ഗാനം ആലപിക്കുന്നത്. കന്നയ്യയുടെ സംഗീത ജീവിതത്തിലെ 4994-ാമത്തെ ഗാനമാണിതെന്ന് പറഞ്ഞാണ് മനോജ് തിവാരി പാടി തുടങ്ങുന്നത്. ‘മന്ദിർ അബ് ബനാനേ ലഗാ ഹേ, മന്ദിർ ജബ് ബൻ ജായേഗാ തോ’ (‘ഉയരുകയായ് രാമ ക്ഷേത്രം… നിറയുകയായ് കാവി’)എന്നിങ്ങനെയാണ് പാട്ടിലെ വരികൾ. പാട്ടിന്റെ കുറച്ച് ഭാഗം മാത്രമെ പുറത്തുവിട്ടിട്ടുള്ളൂ. അയോദ്ധ്യ ക്ഷേത്രം, കാശി മഹാദേവക്ഷേത്രം, മൗത്ര ക്ഷേത്രം എന്നിങ്ങനെ നിരവധി ക്ഷേത്രത്തെ കുറിച്ചും ഗാനത്തിൽ പരാമർശിച്ചിട്ടുണ്ട്.
അതേസമയം തെരഞ്ഞെടുപ്പ് അടുത്തിരിക്കെ ഡിജിറ്റൽ പ്രചാരണം ശക്തമാക്കിയിരിക്കുകയാണ് ബിജെപി. കൊറോണ മഹാമാരി വീണ്ടും വ്യാപിക്കുന്ന സാഹചര്യത്തിൽ തെരഞ്ഞെടുപ്പ് റാലികൾ ഈ മാസം പകുതി വരെ നിരോധിക്കാൻ തെരഞ്ഞെടുപ്പ് കമ്മീഷൻ തീരുമാനിച്ചിരുന്നു. ഇതിന്റെ പശ്ചാത്തലത്തിൽ സമൂഹമാദ്ധ്യമങ്ങളിലൂടെയുള്ള പ്രചാരണത്തിനായി എല്ലാ തയ്യാറെടുപ്പുകളും ബിജെപി നടത്തിക്കഴിഞ്ഞു. എണ്ണായിരത്തോളം പേരാണ് ഇതിനായി പരിശീലനം നേടിയിരിക്കുന്നത്. ഇവർക്കു വേണ്ടി 85 പ്രത്യേക യോഗങ്ങളും വർക്ക് ഷോപ്പുകളും നടത്തിയിട്ടുണ്ട്. ഫെബ്രുവരി 10 ന് ആണ് തിരഞ്ഞെടുപ്പ് ആരംഭിക്കുക. ഏഴ് ഘട്ടമായാണ് യുപിയിൽ തെരഞ്ഞെടുപ്പ് നടക്കുക.
